“Lokalet”/ Analisti: Zgjedhje jo të barabarta. Opozita u caktua nga drejtësia e mazhoranca. Pano Soko: Populli dha mesazh, refuzoi kastën e vjetër

Në emisionin “Open” në News 24 po diskutohet në lidhje me rezultatin e zgjedhjeve lokale, parregullsitë në zgjedhje dhe situatën ku ndodhet opozita pas humbjes së shumicës së bashkive në vend.

I ftuar në studio, analisti Arion Sulo u shpreh se zgjedhjet nuk ishin të lira dhe të ndershme, por se pati intimidim të qytetarëve nga administrata dhe patronazhistët.

Ai ka renditur edhe problemet e evidentuara gjatë këtyre zgjedhjeve.

Ndërkohë Pano Soko nga “Nisma Thurje” ka deklaruar se populli dha një mesazh të madh në këto zgjedhje. Reduktimi i numrit të qytetarëve të cilët zgjodhën të ushtrojnë të drejtën e tyre për të zgjedhur qeveritë vendore, ishte një refuzim që i bënë kastës së vjetër të politikanëve.

Pjesë e diskutimit në studio:

Sulo: Nëse Berisha si pala më e goditur dhe humbëse i ka cilësuar si më të manipuluarat, nuk do isha dakord me cilësimin por që kishte probleme kjo nuk diskutohet.
Gjithçka nisi me gjykatën që caktoi opozitën vetëm dy ditë para përfundimit të afatit, pastaj me KQZ e KAS që nuk i japin të drejtën koalicionit të kenë emrin në fletën e votimit, të mos kenë fonde. Që në fillim kemi zgjedhje jo të barabarta, emërim të opozitës nga drejtësia e për pasojë nga mazhoranca.

Dita e zgjedhjeve, në QV ka qenë një prani e madhe e administratës, për shkak të mungesës së përfaqësuesve të opozitës në komisione. Ata kanë qenë patronazhistë, 5-10 metra larg qendrave apo edhe brenda QV, ka qenë intimidim i qytetarëve.

Zgjedhjet janë të prekura, të njollosura dhe jo të lira e të ndjeshme. Në këtë pikë ka të drejtë Berisha.

Në momentin që në Lezhë , në Shkodër, një parti inekzistente të del e parë në 4 qarqe.

Çelsi i rezultatit në Shkodër janë 13 mijë votat e Tom Doshit, që nuk janë vota socialiste.

Opozita ka një mal me probleme, krizën, mungesën e shpresës, frymëzimit, ne nuk prisnim të fitonin shumicën e bashkive gjithsesi.

Soko: Këtu opozita është refuzuar. Duhet të kuptohet mesazhi që ka dhënë ky popull. 350 mijë votues më pak kanë dalë në votime, është votim ndaj të gjithë kastës, ndaj të vjetrës, Ramës, Berishës, Metës.

Iu është refuzuar oferta. Janë rritur partitë e vogla, ka ardhur koha e të rinjve. Nuk ndërtohet Roma në një ditë. U deshën 32 vite për tu shkatërruar. Surpriza në Tiranë ishte Alind Qorri.
Duhet të merret mesazhi i popullit.

(BalkanWeb)