VIDEO/ Shqipëria fluturon me Asanin dhe Bajramin, kuqezinjtë mundin Moldavinë për të ndjekur ëndrrën europiane

17 June, 2023

17 June, 2023

Kombëtarja shqiptare e futbollit ka fituar me shifrat 2-0 ndeshjen e sotme të kualifikuesve të Euro 2024 ndaj Moldavisë, për të regjistruar pikët e para të saj në grupin kualifikues.

Ekipi i drejtuar nga braziliani Silvinjo ka bërë gjithçka mirë në duelin e sotëm, duke dominuar plotësisht ndeshjen, në kërkim të golit të avantazhit. Ai do të vinte vetëm në pjesën e dytë me një gjuajtje spektakolare të Asanit, duke i dhënë qetësinë që i duhej skuadrës për të vijuar e qetë minutat e mbetura.

Një tjetër gjuajtje e shkëlqyer e Bajramit, dyfishoi shifrat më pas dhe vulosi fatin e kësaj ndeshje, për t’u dhënë kuqezinjve tre pikë të rëndësishme për të vazhduar ndjekjen e dyshes së kreut që të çon në Euro 2024.

SHQIPËRI-MOLDAVI 2-0
51′ Asani, 76′ Bajrami

NGJARJET KRYESORE

90’+5’ Mbyllet ndeshja me fitoren 2-0 të Shqipërisë.

90’ Jepen 5 minuta shtesë.

88’ Seferi dhe Muçi marrin vendin e Uzunit dhe Bajramit në minutat e fundit.

85’ Pas një goditje dënimi nga e majta e sulmit moldav, topi harkohet në zonë, por devijimi kalon sferën mbi traversë.

81’ Hysaj dhe Mehmeti kombinojnë mirë në krahun e djathtë, por pastaj nuk ia dalin të gjejnë harkimin e duhur në zonë për shokët e skuadrës dhe shpërdorojnë një mundësi të mirë për të rrezikuar.

78’ Platica gjuan nga jashtë zonës, Berisha është i vëmendshëm dhe kontrollon sferën.

76’ GOOOL SHQIPËRIA! Aksion i shpejtë i kuqezinjve me një depërtim nga e djathta dhe Bajrami nuk gabon duke shënuar golin e 2-0.

73’ Platica dhe Kojoçari marrin vendin e Bobogli dhe Revenço te Moldavia.

67’ Asani del nga fusha e lojës për t’i bërë vend Mehmetit. Ndërsa Asllani merr vendin e bares në fushën e lojës.

66’ Postolaki merr vendin e Nikolaesku në radhët e Moldavisë.

64’ Cikalleshi tenton nga e majta me një gjuajtje të fortë, sfera nuk i afrohet katërkëndorit.

62’ Uzuni shpërdoron një mundësi të artë para portës moldave, teksa gjuan me kokë jashtë edhe pse i vetëm. Por më pas aksioni vlerësohet i pavlefshëm për një pozicion jashtë loje të Hysajt.

56’ Stina dhe Kojoçaru marrin vendin e Motpan dhe Damasçan në radhët e Moldavisë.

51’ GOOOL SHQIPËRIA! Jasir Asani nga e djathta gjen një goditje të shkëlqyer dhe mposht portierin kundërshtar.

50’ Një aksion i shpejtë nga e majta sjell një pasim në qendër për Asanin, por ky i fundit nuk gjen kontaktin me topin para portës.

46’ Nis pjesa e dytë e ndeshjes pa zëvendësime në radhët e dy ekipeve.

45’+2’ Mbyllet pjesa e parë pa gola.

45’ Jepen 2 minuta shtesë.

44’ Posmaç provon nga distanca, sfera kalon larg portës së Berishës.

42’ Bajrami tenton me një goditje dënimi pranë zonës, sfera përfundon jashtë, jo shumë larg katërkëndorit të portës mike.

40’ Berisha shmang një situatë të rrezikshme teksa del për të kontrolluar një top të devijuar drejt zonës së vogël.

38′ Motpa ndëshkohet me karton të verdhë për faull në mesfushë.

36’ Bare në krahun e djathtë gjen fundoren dhe pason në qendër, por mbrojtësit miq largojnë përsëri rrezikun.

34’ Miqtë rrezikojnë me një goditje dënimi pasi topi mbetet për disa çaste mes lojtarëve por më pas mbrojtja largon rrezikun.

31’ Një kombinim mes Asanit dhe Bajramit në të djathtën, ndalet nga Posmaç i cili bllokon hyrjen e futbollistëve kuqezi në zonë.

29’ Vazhdon një dominim i plotë i kuqezinjve në mbajtjen e topit, me moldavët të cilët rrezikojnë rrallëherë me topa të gjatë në kërkim të kundërsulmit.

22’ Mitaj rrëzohet në zonë pas një kontakti, por më pas ndëshkohet me karton të verdhë për simulim.

21’ Predhë e Cikalleshit nga distanca, topi ndalet nga traversa e portës duke dëshpëruar sulmuesin.

20’ Gjuajtje e fortë e Ramadanit nga distanca, topi shkon në duart e portierit.

18’ Harkim i rrezikshëm i moldavëve nga e majta e sulmit, Nikolesku gjuan me kokë por fluturon topin mbi traversë.

17’ Uzuni tenton nga jashtë zonës, por nuk gjen katërkëndorin e Railean.

16’ Dy goditje këndi radhazi të kuqezinjve, mbrojtja mike largon me vështirësi.

14’ Shqipëria ka plotësisht kontrollin e lojës, me moldavët e kthyer në mbrojtje për të ndalur ofensivën kuqezi.

9’ Uzuni hyn në zonë në krahun e djathtë, por gjuajtja e tij ndalet nga mbrojtësit kundërshtarë.

8’ Bajrami bën një driblim spektakolar në krahun e majtë dhe fiton një faull interesant në kufijtë e zonës pasi ndalet në mënryë të parregullt.

6’ Goditje këndi e harkuar nga Bajrami, Ismajli gjen kohën për të gjuajtur me kokë por portieri i moldavëve pret në pozicion.

2’ Moldavët sulmojnë menjëherë në krahun e djathtë me një harkim të rrezikshëm në shtyllën e dytë, por pa gjetur askënd.

1’ Nis dueli në “Air Albania”.

FORMACIONET:

SHQIPËRIA: Berisha, Mitaj, Gjimshiti, Ismajli, Hysaj, N.Bajrami, Ramadani, Bare, Uzuni, Asani, Cikalleshi
Trajner. Silvinjo

MOLDAVIA: Railean, Posmaç, Mudraç, Kraçiun, Reabçiuk, Baboglo, Revenço, Rata, Motpa, Damaskan, Nikolaesku
Trajner. Sergei Kleshçenko

PANORAMASPORT.AL