“Mënyra e veprimit tregon hakmarrja të fortë”, ish-drejtuesi i policisë për atentatin në Fushë-Krujë: Gupet kriminale nuk i tremben shtetit

Asllan Dogjani, ish-Drejtues i Policisë së Shtetit, ka komentuar këtë mbrëmje në “Open” atentatin me një viktimë dhe dy fëmijë të plagosur, ndodhur në orët e para të mëngjesit të sotëm në fshatin Larushk në Fushë-Krujë.

Ai thotë se nga mënyra e organizmit dhe kryerjes së këtij atentatit, kuptohet se ka një hakmarrje të jashtëzakonshme dhe një inat të madh.

Sipas tij këto janë ngjarje që krijojnë panik tek qytetarët, ndërsa shtron pyetjen se ku e gjejnë këtë guxim grupet kriminale, të cilat sipas tij nuk i frikësohen as policisë.

“Ky lloj kriminaliteti tregon që autorët nuk kanë frikë nga shteti. Mënyra si kanë vepruar tregon se e njohin territorin. Të paktën njëri nga ata duhet të jetë banor i zonës. Fakti që kanë qëlluar me breshëri automatiku, tregon hakmarrje të jashtëzakonshme dhe nuk kanë pyetur nëse ka apo jo fëmijë.

Edhe nëse këta do të kenë qenë autorë të paguar, do të thotë se pagesa ka qenë e lartë sepse kanë qëlluar pa ndërprerje për të ekzekutuar objektivin.

Mund të jetë e lidhur me hakmarrje, larje hesapesh. Më bën përshtypje se ku e marrin guximin këto grupe, në një kohë që në zonën e Krujës është e njëjta skenë… digjet makina, autorë janë disa persona.

Çfarë bën policia e shtetit? Kjo ngjarje ka përcjellë panik e pasiguri tek qytetarët”, shprehet ai.