Debutim ëndrrash, Messi i jep fitoren Inter Miamit, kampioni i botës lë shenjën e parë në futbollin amerikan

Një debutim ëndrrash, siç mund ta bëjnë vetëm të mëdhenjtë, ose më i madhi nga të gjithë. Debutimi i Leo Messit me Inter Miami ishte një sukses i jashtëzakonshëm.

36-vjeçari argjentinas, i cili u prezantua me madhështi të dielën e kaluar para ttifozëve të rinj, u hodh në fushë në minutën e 54-t kundër skuadrës meksikane Cruz Azul, së bashku me ish-shokun e tij të skuadrës së Barcelonës, Sergio Busquets. Zhurma e 20.000 shikuesve dhe brohoritja ‘Messi, Messi, Messi’ sollën zyrtarisht një epokë të re për futbollin amerikan.

Shiriti i kapitenit iu dorëzua menjëherë kampionit të botës dhe ish-lojtari i PSG-së nuk vonoi t’i merrte gjërat në dorë, duke u vendosur në qendër të lojës së skuadrës së trajnerit Tata Martino. Duke hyrë në fushë me Inter Miami në avantazh 1-0, Messi pa Cruz Azul të barazonte në minutën e 65-të.

Më pas skenari shkroi fundin perfekt të historisë, duke vendosur gjithçka në minutën e 94-t, kur gjyqtari i ndeshjes akordoi goditje dënimi për vendasit. Leo shënoi një super gol, ai i fitores në “frymën e fundit”, me këmbën e tij të majtë magjike.

Stadiumi shpërtheu së bashku me fishekzjarrë, shokët e skuadrës përqafuan liderin e ri dhe dikush shpërtheu në lot në tribunë. Ai ishte David Beckham. Në atë moment, pronari i Inter Miamit pa një ëndërr që e kishte dashur për shumë vite duke u realizuar: Messi në Amerikë për të predikuar futbollin.

()