Kolegji Zgjedhor vendosi ripërsëritjen/ Rrogozhina voton sot për zgjedhjen e kryebashkiakut të ri

Qytetarët e Rrogozhinës u drejtohen sërish sot, kutive të votimit për të zgjedhur kryebashkiakun e ri.

Janë mbi 32 mijë qytetarë me të drejtë vote, të cilët do t’u drejtohen qendrave të votimit nga ora 07:00 deri në 19:00 të mbrëmjes.

Ndërkohë gazetari Osman Stafa raportoi për “” se fillimisht ka problematika në 2 qendra votimi, ku nuk ka nisur ende procesi i votimit pasi komisionerët kanë shkuar me vonesë, por aktualisht janë rregulluar.

Në qendrat e votimit do të ketë një kuti votimi dhe zgjedhësit do të votojnë vetëm në një fletë, ndryshe nga 14 maji.

Janë 54 qendra votimi deri më tani, në të cilat, 32 mijë e 826 qytetarë do të votojnë për kryebashkiakun, ku po njësoj si në zgjedhjet vendore, i pari në fletën e votimit do të jetë i renditur kandidati socialist Edison Memolla dhe numrin 2 do ta mbajë Shkëlqim Hoxha. Shpresat për këtë të fundit janë shtuar, pasi në këto zgjedhje nuk do të votojnë të burgosurit, që në zgjedhjet e fundit vulosën fitoren e Edison Memollës.

Në KQZ ka mbërritur një kërkesë nga burgjet për votimin e 89 të burgosurve që gëzojnë të drejtën e votës në institucionin e burgut “Kosova”, por afatet nuk premtojnë, e për sa kohë nuk ka një vendim nga Bashkia e KZAZ-ja, në burg nuk do të ngrihet një qendër votimi.

Në zgjedhjet e 14 majit, në Rrogozhinë morën pjesë në votime rreth 11 mijë votues, por me ankesë të koalicioni “Bashkë Fitojmë”, Kolegji Zgjedhor vendosi të shpallë të pavlefshme zgjedhjet pas një sërë shkeljesh.

Komisioneri Shtetëror i Zgjedhjeve, Ilirjan Celibashi vendosi këtë datë për mbajtjen e zgjedhjeve, pasi Kolegji Zgjedhor pranoi ripërsëritjen e tyre.