I ndodhi edhe vitin e kaluar me Partizanin, Dritan Mehmeti konfirmon largimin edhe nga Dinamo pa filluar sezoni

Dritan Mehmeti ka mbyllur nga sot aventurën me Dinamon. Trajneri kryeqytetas ka marrë këtë vendim për të ardhmen, pasi i është komunikuar nga drejtuesit e klubit për një ndryshim në bashkëpunimin mes tyre, çka nënkupton se atij i është ofruar një pozicion tjetër, por që Mehmeti nuk e ka pranuar.

Ishte një lëvizje e pritshme, duke pasur parasysh zhvillimet e fundit, me projektin ‘Dinamo City’ dhe afrimin e disa aksionerëve të tjerë. I kontaktuar nga “Panorama Sport”, trajneri Dritan Mehmeti është shprehur:

“Po, nuk jam më pjesë e Dinamos. E mora drejtimin e kësaj skuadre në një moment shumë të vështirë sezonin e kaluar, një moment mjaft delikat. Arritëm një sukses me ngjitjen në Superiore dhe kishim nisur përgatitjet për sezonin e ri.

Më ka kontaktuar sot një drejtues i klubit për të më komunikuar vendimin. Puna ime përfundon këtu dhe i uroj suksese Dinamos në të ardhmen. Falënderoj tifozët e Dinamos për mbështetjen”.

Tani pritet që drejtimin e Dinamos ta marrë trajneri italian Luigi Di Biago, me të cilin klubi ka arritur akordin. Në fillim të javës së ardhshme skuadra kryeqytetase do të shkojë në Itali për vazhdimin e fazës përgatitore dhe aty do të nisë punën trajneri i ri, që me shumë gjasa do të ketë stafin e tij.

()