Emrat/ Aksidenti tragjik në Sarandë, një 17-vjeçar drejtonte “Benz”-in që u përplas me dy turistët italianë
Detaje të reja janë zbuluar nga aksidenti tragjik që ndodhi pak orë pas mesnatës në aksin Sarandë-Ksamil, ku të vdekur mbetën 2 turistë italianë dhe u plagosën dy të rinj shqiptarë.
Mësohet se automjeti “Mercedes Benz” që u përfshi në aksident drejtohej nga një 17-vjeçar, ndërsa pasagjer ishte një 16-vjeçar.
Të dy të rinjtë janë dërguar në spital pas përplasjes me motoçikletën tip “Honda” në të cilën udhëtonin dy shtetasit italianë që humbën jetën, 24-vjeçari Domenico Gritto dhe Vicenzo Tizziano.
Sakaq, ende nuk është zbardhur dinamika e plotë e aksidentit fatal, ndërsa policia vijon punën për zbulimin e shkaqeve.
Njoftimi i policisë:
Sarandë/Informacion paraprak
Rreth orës 03:00 të datës 24.08.2023, në aksin rrugor Sarandë-Ksamil, në vendin e quajtur “Hidrovor”, automjeti tip “Mercedes Benz”, me drejtues shtetasin E. R., 17 vjeç, është përplasur me një motomjet tip “Honda”.
Si pasojë e përplasjes kanë humbur jetën shtetasi italian D. G., 24 vjeç dhe një shtetas tjetër, ende i paidentifikuar, që udhëtonin me motomjetin tip “Honda”.
Drejtuesi i automjetit, shtetasi E. R. është dërguar në spital, bashkë me shtetasin M. R., pasagjer në automjet.
Grupi hetimor po punon për sqarimin e rrethanave të aksidentit
