Gjykata Kushtetuese legjitimon studentët e mjekësisë, pezullon ligjin për punësimin e detyruar
Përmes një vendimi të shpallur ditën e martë, Gjykata Kushtetuese pezulloi përkohësisht ligjin e punësimit të detyruar për studentët e mjekësisë, ligj i cili i detyronte ata të punonin në Shqipëri për të paktën pesë vite pas përfundimit të studimeve ose të shlyenin pagesat e shkollimit.
“Mbledhja e Gjyqtarëve të Gjykatës Kushtetuese vendosi sot në datën 14.11.2023, pranimin e kërkesës për pezullimin e zbatimit të ligjit nr. 60/2023 ‘Për trajtimin e veçantë të studentëve që ndjekin programin e integruar të studimit të ciklit të dytë “Mjekësi e Përgjithshme” në institucionet publike të arsimit të lartë”, shkruhet në njoftimin e Gjykatës Kushtetuese.
Ligji në fjalë u miratua nga Kuvendi i Shqipërisë në muajin Korrik të këtij viti dhe u pasua nga protesta të shumta të studentëve të Universitetit të Mjekësisë, të cilët e cilësuan atë si cënim të të drejtave dhe lirive të tyre dhe e paditën në Gjykatën Kushtetuese.
Protestat e studentëve të mjekësisë kanë nisur që prej muajit Qershor kur flitej për mundësinë e një projektligji që do i detyronte ata të punonin në Shqipëri të paktën pesë vite pas diplomimit. Projektligji më pas u miratua në Parlament më 21 Korrik 2023, pavarësisht kundërshtimit të studentëve.
Një grup përfaqësues i studentëve bëri më pas padi në Gjykatën Kushtetuese, ndërsa studentët bojkotuan mësimin dhe refuzuan nënshkrimin e kontratave. Pas pothuajse një muaji bojkot nga ana e studentëve, në fillim të Nëntorit rektorati ra dakord për pezullimin e zbatimit të ligjit edhe për zëvendësimin ditëve të humbura mësimi.
