Alarm tek PSG, familja e portierit merret peng nga hajdutët
Portjeri i tretë i PSG-së, Alexandre Letellier, mund të thuhet se ka përjetuar një makth të hënën mbrëma, ku së bashku me familjen e tij ishin viktima të një grabitjeje në shtëpi.
33-vjeçari, gruaja Chloe dhe dy fëmijët e tyre gjashtë dhe dy vjeç u përballën me katër kriminelë të cilët kërkonin para dhe bizhuteri.
Çifti u zgjua nga alarmet në shtëpinë e tyre në Yvelines, afër Parisit, rreth orës 2 të mëngjesit pasi hajdutët hynë në kopshtin e tyre.
Ata menjëherë thirrën policinë, por kriminelët deri në këtë moment kishin hyrë Brenda në shtëpi dhe kishin kërcënuar me thikë familjen.
Gruaja e Letellier u godit në fytyrë gjatë grabitjes, sipas një raporti nga RMC Sport në Francë.
Megjithatë, policia mbërriti me shpejtësi dhe arrestoi tre nga katër kriminelët, një të rritur 21-vjeçar dhe dy të mitur 16-vjeçarë. Ata u caktuan në paraburgim nga policia gjyqësore e Versajës.
RMC raportoi se në vendin e ngjarjes u gjet një thikë dhe tek të dyshuarit iu gjetën sende të ndryshme të vjedhura nga shtëpia.
Letellier është aktualisht portieri i tretë i PSG-së, pas Gianluigi Donnarumma dhe Keylor Navas në renditje.
Ai ka luajtur vetëm dy herë për kampionët francezë që kur erdhi nga Orleans në 2020.
