Shtëpia e Bardhë: Biden nuk dinte gjë, Austin me kancer në prostatë
Shtëpia e Bardhë deklaroi se sekretari amerikan i Mbrojtjes Lloyd Austin po trajtohej për kancer. Austin 70 vjeç, u shtrua në spital më 1 janar dhe më pas në njësinë e kujdesit intensiv për komplikime pas operacionit në dhjetor.
Ai është përballur me kritika pasi e mbajti të fshehtë trajtimin në spital. Vonesa në njoftimin e Shtëpisë së Bardhë ngriti shqetësime të mundshme të sigurisë kombëtare dhe çështje të transparencës brenda administratës së Biden.
Sekretari i Mbrojtjes është poshtë presidentit në zinxhirin komandues për ushtrinë amerikane dhe është një nga anëtarët më të rëndësishëm të kabinetit të presidentit. Pentagoni konfirmoi se Austin është i shtruar në spital.
Në një konferencë për shtyp të martën, zëdhënësi i Këshillit të Sigurisë Kombëtare John Kirby tha se Presidenti Biden u informua vetëm atë ditë për diagnozën e kancerit të prostatës.
“Askush në Shtëpinë e Bardhë nuk e dinte se Sekretari Austin kishte kancer në prostatë deri sot në mëngjes”, tha ai. Ndërsa ai theksoi se reagimi fillestar i presidentit ishte shqetësimi për shëndetin e sekretarit, zoti Kirby pranoi se komunikimet nuk ishin “optimale”.
