Ndodh edhe kjo në ‘Grammy’, reperi përfundon në pranga pasi fiton 3 çmime

‘Grammy Awards 2024’ ishte një mbrëmje yjesh e çmimesh të rëndësishme, por prapaskenat nuk janë dhe aq të këndshme. Mediat e huaja raportojnë se reperi amerikan Killer Mike është vënë në pranga pasi është përfshirë në një përplasje fizike pak pasi fitoi tre çmime ‘Grammy’.

Lajmi është bërë i ditur nga policia rajonale e Los Angeles. Incidenti ka ndodhur brenda Crypto.com Arena ku u mbajt ceremonia.

Ai po hetohet në gjendje të lirë dhe seanca e radhës është caktuar  në fund të këtij muaji. Videoja nga vendi i ngjarjes tregonte momentin kur Killer Mike, emri i vërtetë i të cilit është Michael Render, shoqërohej në pranga nga oficerët e policisë.

Theksojmë se incidenti i pakëndshëm ndodhi menjëherë pasi reperi dhe aktivisti politik fitoi tre çmime Grammy, të parat e tij për 20 vjet.

Kënga e tij Scientists & Engineers, me André 3000, Future dhe Eryn Allen Kane, fitoi çmime për këngën më të mirë rep dhe performancën më të mirë rep.