FOTO/ Rei Manaj në Arabinë Saudite? Sulmuesi e përgënjeshtron: Fake news
Rei Manaj mund të largohet nga Sivasspor. Pas sezonit të shkëlqyer me ekipin turk, sulmuesi kuqezi pritet të transferohet drejt një skuadre tjetër pasi ofertat për të nuk mungojnë.
Gjatë ditës së kaluar në media të ndryshme ka qarkulluar emri i klubit të Arabisë Saudite, Damac, si më i interesuari për firmën e futbollistit. Edhe ky i fundit raportohej se ishte i lumtur me këtë destinacion dhe vetëm pritej akordi mes arabëve dhe Sivasporit.
Por ka qenë vetë Manaj i cili nëpërmjet rrjeteve sociale, ka përgënjeshtruar këtë opsion transferimi në këtë moment të karrierës. Në një nga lajmet që raportohej për transferimin e tij te klubi në fjalë në Arabinë Saudite, ai ka shkruar “Fake news”, duke e hedhur poshtë kësisoj këtë variant që ishte diskutuar për të ardhmen e tij.
