Pjesë e grupit kriminal që trafikonte armë/ Detaje nga arrestimi në Kolumbi i 25-vjeçarit nga Tropoja, momenti kur Admir Tutaj vihet në pranga

Sipas informacioneve të marra, ai kërkohej nga Interpoli për trafik armësh dhe për pjesëmarrje në një organizatë kriminale, në të cilën kishte rolin e drejtimit të logjistikës dhe transportit për shitje në tregun e zi të armëve të zjarrit me rreze të mesme dhe të gjatë, të cilat përdoreshin nga mafia shqiptare.

Sipas medias kolumbiane, ai u kap pas mbërritjes së tij në Barranquilla dhe iu dorëzua Prokurorit të Përgjithshëm të Kombit nëpërmjet Drejtorisë së Çështjeve Ndërkombëtare.

‘Almirante Tutaj’ do të ishte në shënjestër të autoriteteve të vendit të tij, pasi dyshohej se i përkiste grupit kriminal që tentoi të trafikonte armë dhe municione përmes Portit të Durrësit.

Në prill të një viti më parë, u sekuestruan shtatë pistoleta që po tentonin të hynin së bashku me një sasi të madhe municionesh të fshehura në një kamionçinë. Po kështu, në gusht të këtij viti, hetimet e SPAK zbuluan vendndodhjen e 25 armëve të zjarrit, mes tyre pistoleta dhe automatikë.

Gjykata e Posaçme e Shkallës së Parë për Korrupsionin dhe Krimin e Organizuar i ka caktuar masën e sigurisë “Arrest në burg”, për veprën penale “Trafikimi i armëve dhe i municionit”, kryer në kuadër të grupit të strukturuar kriminal.