Vdekja e Liam, reagon Zayn Malik: Ndjehem i shkatërruar

Zayn Malik, ka bërë homazhe për ish-anëtarin e One Direction, Liam Payne. Ditën e djeshme, ai publikoi në Instagram një mesazh emocional për Payne, i cili ndërroi jetë më 16 tetor në moshën 31 vjeçare.

“Liam, gjej veten duke folur me zë të lartë me ty, duke shpresuar se mund të më dëgjosh. Nuk mund të mos mendoj në mënyrë egoiste se kishim ende shumë biseda për të bërë në jetën tonë,” shkroi Malik pranë një fotoje të vjetër ku ata janë duke fjetur në një makinë. “Asnjëherë nuk pata mundësinë të të falenderoj për mbështetjen që më dhe në disa nga periudhat më të vështira të jetës sime.”

Këngëtari i “Dusk Till Dawn” shtoi se ish-anëtari i grupit gjithmonë kishte një “qasje pozitive” dhe i kujtonte atij se ishte “i dashur” gjatë kohërave të vështira.

Malik më pas iu referua marrëdhënies së tyre të trazuar, që përfshinte një moment kur Malik e përplasi muzikantin e ndjerë në mur gjatë një grindjeje të fortë.

“Edhe pse ishe më i ri se unë, gjithmonë ishe më i matur, i vendosur, me mendim të fortë dhe nuk e kishe problem të tregoje kur njerëzit gabonin,” shkroi Malik. “Edhe pse disa herë përplaseshim për këtë [emoji duke qeshur], gjithmonë e respektoja fshehurazi.”

Reagimi i plote:

Liam, e gjej veten duke folur me zë të lartë me ty, duke shpresuar që mund të më dëgjosh. Nuk mund të mos mendoj egoist se kishte shumë më tepër biseda që na munguan për t’i pasur në jetët tona. Nuk pata kurrë mundësinë të të falënderoj që më mbështete gjatë disa prej periudhave më të vështira të jetës sime. Kur më mungonte shtëpia si një 17-vjeçar, ti gjithmonë ishe aty me një buzëqeshje pozitive dhe më siguroje se isha miku yt dhe se isha i dashur.

Edhe pse ishe më i ri se unë, gjithmonë ishe më i arsyeshëm se unë. Ti ishe kokëfortë, mendjehapur dhe nuk të bëhej vonë për t’u thënë njerëzve kur ishin gabim. Edhe pse herë pas here kemi përplasur mendimet për këtë gjë, gjithmonë të kam respektuar fshehtazi për këtë. Kur vinte puna te muzika, Liam, ti ishe më i kualifikuari në çdo aspekt. Unë nuk dija asgjë në krahasim, isha një fëmijë fillestar pa përvojë, ndërsa ti ishe tashmë një profesionist.

Gjithmonë isha i lumtur të dija se, pavarësisht se çfarë ndodhte në skenë, ne gjithmonë mund të mbështeteshim te ti për të ditur se cilin drejtim të ndiqnim më pas. Humbja jote më la pa një vëlla dhe nuk mund ta shpjegoj dot sa shumë do të doja të të jepja një përqafim edhe një herë të fundit dhe të të thosha mirupafshim siç duhet, duke të thënë që të kam dashur dhe respektuar shumë. Do t’i ruaj në zemër të gjitha kujtimet që kam me ty përgjithmonë.

Nuk ka fjalë që mund të justifikojnë ose të shpjegojnë se si ndjehem tani përveçse ndjehem i shkatërruar. Shpresoj që, kudo që je tani, të jesh mirë dhe në paqe 🙏 dhe të dish sa shumë je i dashur.

Të dua, vëlla.