Prindërit në protestë: Drejtësi për Martin Canin dhe siguri në shkolla
Prindër, aktivistë dhe të rinj mbajtën dy protesta të njëpasnjëshme gjatë javës së fundit për të kërkuar drejtësi për vrasjen e 14 vjeçarit Martin Cani nga bashkëmoshatari i tij pranë shkollës Fan Noli në Tiranë.
Ata bënë thirrje për transparencë dhe hetim të pavarur mbi ngjarjen, si mënyra e vetme për të vendosur drejtësi për viktimën dhe familjen e tij.
“I bëj thirrje organit hetimor për një hetim transparent dhe të pavarur, është e vetmja mënyrë për të vënë drejtësi”, tha Gentian Sejrani, jurist në organizatën Drejtësi Sociale, pasi shtoi se version i Policisë së Shtetit mbi agresorët nuk përkonte me atë të deklaruar nga babai i njërit prej fëmijëve të plagosur në konflikt.
Protestuesit fajësuan sërish institucionet si Ministria e Arsimit, dhe instanca të tjera shtetërore që nuk kryesnë funksionet e tyre primare të edukimit të fëmijëve, si edhe të mbështetjes për familjet shqiptare me vështirësi ekonomike.
Të shumtë ishin ata që kërkuan dorëheqjen e ministres së Arsimit, Ogerta Manastirliu, duke e akuzuar për mosreagim dhe mosmarrje të masave për një sistem arsimor cilësor, teksa thanë se shkollat janë kthyer në institucione që i shërbejnë qëllimeve elektorale të drejtuesve të ministrive.
“Siguria e jetës së fëmijëve tanë nuk mund të jetë ngjarja e rradhës për debatet dhe përballjet e tyre politike”, tha juristi Gentian Sejrani.
Protestuesit artikuluan shqetësimet e tyre për sigurinë e fëmijëve, duke i drejtuar Ministrisë së Arsimit disa kërkesa specifike, ndër të tjera shtimin e buxhetit në nivelin 5% të GDP-së për arsimin, kërkesa për oficerët e sigurisë në shkolla si edhe për plotësimin me psikologë.
