Nuk deklaroi para bluve se shoku i tij e plagosi me armë zjarri në këmbë, arrestohet 24 vjeçari

Një 24 vjeçar është arrestuar nga policia e Shkodrës pasi dha deklaratë të rremë përpara uniformave blu, lidhur me plagosjen e tij.

Në pranga ra i riu me iniciale A.B., 24 vjeç, i cili nuk sqaroi për autoritetet se ka qenë shoku i tij ai që e plagosi atë në këmbë.

Autori i kësaj i ngjarje është 22 vjeçari me iniciale E.Sh.

24 vjeçari akuzohet për veprën penale “Moskallëzim i krimit”, parashikuar sipas nenit 300 të Kodit Penal të Republikës së Shqipërisë, i dënueshim me gjobë ose burgim deri në 3 vite.

Njoftimi i policisë:

Nuk dha deklarim të plotë në Polici, në lidhje me rrethanat e plagosjes së tij me armë zjarri në këmbë, vihet në pranga 24-vjeçari.

Vijon puna për kapjen dhe arrestimin e autorit të plagosjes së 24 vjeçarit.

Specialistët për Hetimin e Krimit të Komisariatit të Policisë Shkodër në vijim të punës  për zbardhjen e rrethanave dhe dokumentimin ligjor të plotë të ngjarjes së ndodhur më datë 23.12.2024, bënë arrestimin për veprën  penale “Moskallëzimi i krimit“ të shtetasit të plagosur  A. B., 24 vjeç.

Ky shtetas gjatë veprimeve hetimore për zbardhjen e rrethanave dhe dokumentimin ligjor të ngjarjes nuk dha deklarime të plota në lidhje me rrethanat dhe autorin e plagosjes së tij në këmbë me armë zjarri.

Në vijim të veprimeve Policia ka  shpallur në kërkim shtetasin  E. Sh., 22 vjeç, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Plagosja e rëndë nga pakujdesia”, i cili dyshohet se ka plagosur nga pakujdesia shokun e tij shtetasin A. B.

Vijon puna për kapjen e 22 vjeçarit.

Materialet procedurale i kaluan Prokurorisë për veprime të mëtejshme.