Nis numërimi mbrapsht, në Riad Inter e Milan duelojnë për trofeun e parë sezonal, Thuram e Leao mbajnë në ankth Inzaghi-n e Coincecao-n

Në Riad çdo gjë është gati, teksa sonte në mbrëmje Inter dhe Milan do të përballen me njëra tjetrën për të garuar për të parin trofe sezonal, atë të Superkupës italiane. Inter tenton të hyjë në histori, teksa skuadra e Simone Inzaghit do të tentojë ta fitojë këtë trofe për të 4 vit radhazi, duke shkuar në 9 trofe, po aq sa ka edhe Juventus. Një sukses që jo vetëm do t’i shtojë një tjetër trofe klubit zikaltër, por do t’i rikonfermojë ata si skuadra për t’u mundur këtë sezon.

Këtë gjë e di fare mirë edhe tekniku zikaltër, Simone Inzaghi i cili në konferencën për shtyp 1 ditë para finales thekson se ky do të jetë një derbi plotësisht ndryshe nga ai i kampionatit në fazën e parë dhe se skuadra e tij ka mësuar nga gabimet e asaj ndeshje:

“Derbi është një ndeshje speciale, një sfidë emocionuese. Për mua ky do të jetë derbi numër 13, që kur kam ardhur këtu. Kam kujtime të paharrueshme nga sfidat me Milanin. Mendoj se skuadra është gati, ne kemi mësuar nga gabimet e sfidës së zhvilluar në kampionat. Coincecao është mjaft i përgatitur, ai zhvillon një futboll vertikal, ndaj Juves në pjesën e dytë skuadra e tij luajti mjaft mirë, do të jetë një finale e luftuar”.

Ndërkohë në krahun tjetër, pavarësisht se nuk vijnë si favorit, Milan do të tentojë gjithçka për gjithçka në finalen ndaj Interit. Jo vetëm pasi në Riad do të luhet një trofe, por edhe për t’i dhënë entuziasëm dhe besimin e duhur skuadrës së Coincecaos, për vijimin e sezonit. Tekniku portugez shfaqet optimist përpara ndeshjes teksa thekson se skuadra e tij, do të tentojë ta fitojë trofeun pavarësisht se Inter është një skuadër tepër e fortë:

“Shpresoj se skuadra do të bëjë më mirë se unë. Kemi një ditë më pak në dispozicion për ta përgatitur finalen, si dhe do të vuajmë mungesën e disa lojtarëve të rëndësishëm. Leao? Do të shohim gjendjen e tij pak para ndeshjes, por e sigurte është që nuk ka mundësi të luajë 90 minuta. Do të provojmë ta fitojmë ndeshjen, megjithëse jemi të ndërgjegjshëm për vështirësitë që na presin”.

Sfida mes Interit e Milanit, e vlefshme për finalen e Superkupës italiane, do të luhet sonte në AL Awwal Park në orën 20.