Liverpool nuk di të ndalet, por Salah i trembet Man.City: Do rikthehen fuqishëm
Ky sezon i Premier League po “vishet” me të kuqe, me Liverpool që ka një ritëm krejtësisht ndryshe nga ekipet e tjera. Arsenal duket ekipi i vetëm që mund t’i rivalizojë, por dhe “topçinjtë” vijojnë sezonin me ulje ngritje të forta. Ndryshe nga vitet e fundit, Liverpool po përfiton në maksimum nga kriza e thellë që ka mbërthyer Man.City, aktualisht ndodhen plus 12 pikë në raport me ekipin e Guardiola-s, por kanë dhe një ndeshje më shumë në dispozicion.
Arne Slot, trajneri i Liverpool, po shijon këtë sezon edhe një super Salah, me egjiptianin që po tregon versionin e tij më të mirë teksa në 19 ndeshje ka shënuar 18 gola vetëm në Premier League. Aktualisht, Liverpool shihet nga të gjithë si favoriti kryesor për të triumfuar në ishull, por Salah nuk e bën gjumin i qetë, i vetëdijshëm se City mund të rikthehet fuqishëm:
“Në fakt jam i befasuar nga Man.City, por deri diku edhe i kuptoj. Është gjithnjë i njëjti trajner, të njëjtët lojtarë. Kanë pasur edhe dëmtime, kjo nuk mund të injorohet, por jam i sigurt se ata do të rikthehen shumë shpejt në nivelin e tyre. Neve nuk na mbetet gjë tjetër vetëm të fitojmë ndeshjet tona, pasi jam i bindur se kur City të gjejë rrugën e duhur nuk do të ndalet më”, u shpreh Salah për Canal+.
Ndër të tjera, ylli i Liverpool konfirmoi sërish se nuk ka asnjë të re në lidhje me të ardhmen e tij, deri në këtë pikë largimi i tij në fund të këtij sezoni duket i sigurt.
()
