Tërmet i fuqishëm godet Shigatsen në Tibet, 95 viktima dhe 130 të lënduar

Tërmeti me magnitudë 7.1 që goditi qytetin Shigatse të Tibetit mëngjesin e kësaj të marte ka shkaktuar tragjedi, me të paktën 95 të vdekur dhe 130 të lënduar. Tërmeti, që ra në orën 09:00 me orën lokale, ka shkaktuar shkatërrim të madh, me më shumë se 1000 shtëpi të shkatërruara. Zona e goditur ka temperatura jashtëzakonisht të ulëta dhe ka pësuar ndërprerje të energjisë elektrike dhe ujit. Shigatse është një qytet i shenjtë, që ka rëndësi të madhe për budizmin tibetian, dhe është selia tradicionale e Panchen Lama.

Rajoni është i njohur për aktivitetin e tij sizmik, dhe ky tërmet ka sjellë pasgoditje të mundshme, megjithatë ekspertët besojnë se një tërmet tjetër më i fuqishëm është i pamundur. Lëkundjet janë ndjerë gjithashtu edhe në Nepal dhe në pjesë të Indisë, por asnjë viktimë apo dëme të mëdha nuk janë raportuar në këto shtete.

Qeveria kineze ka nisur operacionet e shpëtimit, duke përdorur ndihma ajrore dhe dronë për të mbërritur në zonat e prekura dhe për të ofruar asistencë. Ky tërmet vjen pas një aktiviteti sizmik të vazhdueshëm në rajon, duke përfshirë edhe një tërmet shkatërrues me magnitudë 7.8 në vitin 2015 pranë Katmandu, Nepal.