Zjarret në LA, shtyhen dy nga ngjarjet e rëndësishme të industrisë së filmit
Në vazhdën e zjarreve shkatërruese që kanë përfshirë Los Angeles dhe Kaliforninë Jugore, ceremonia e çmimeve të Oscars dhe Critics Choice Awards kanë bërë njoftime të rëndësishme për ndryshimet e datave të ceremonive të tyre.
Akademia e Arteve dhe Shkencave të Filmit ka njoftuar se shpallja e nominimeve për Çmimet e 97-ta të Oscars, e caktuar për 17 janar, do të shtyhet për 19 janar për shkak të situatës emergjente të zjarreve. Ky ndryshim i papritur u bë për të siguruar sigurinë e të gjithë anëtarëve të akademisë dhe stafit të angazhuar.
Po ashtu, Critics Choice Awards ka njoftuar se ceremonia e 30-të vjetore, e caktuar për 12 janar, do të shtyhet për 26 janar. Zjarret e katastrofshme që kanë shkatërruar Kaliforninë Jugore janë arsyeja e këtij vendimi. Ngjarja e riplanifikuar do të mbahet në Barker Hangar në Santa Monica dhe do të transmetohet drejtpërdrejt në E! dhe në mbarë botën, duke qenë gjithashtu e disponueshme në Peacock ditën tjetër.
Në lidhje me votimin për nominimet e Oscars, ai është hapur mëngjesin e kësaj të mërkure, por është zgjatur me dy ditë për t’u dhënë anëtarëve më shumë kohë për të hedhur votat e tyre. Votimi tani do të mbyllet të martën, më 14 janar, në orën 17:00 PT.
Ky njoftim ka ardhur në mes të zjarreve shkatërruese që kanë përfshirë Los Anxhelosin, duke detyruar disa yje të Hollivudit, përfshirë Mark Hamill, Paris Hilton, Mandy Moore dhe James Woods, të planifikojnë evakuimin e shtëpive të tyre. Zjarret, që shpërthyen më 7 janar, kanë shkaktuar pasiguri të madhe dhe janë një kujtesë për rreziqet natyrore që mund të përballen ata që jetojnë në Kaliforni.
