Uzuni në tribunë, bën foto me tifozët dhe merr duartrokitje. Trajneri: Ai që ndahet nga grupi…

Myrto Uzuni ka qenë protagonisti i madh i barazimit të Granadas ndaj Burgos në natën e të premtes, edhe se nuk ishte në fushën e lojës por në tribunën e stadiumit. Lojtari shqiptar është kthyer në epiqendër të vëmendjes për shkak të situatës që ka lindur pas një oferte që i është bërë nga MLS dhe me trajnerin i cili deklaroi si e ai refuzonte të stërvitej ndaj e kishte lënë jashtë sfidës në fjalë.

Por lojtari dje ka qenë në stërvitje duke kryer seancën i vetëm, ndërsa në darkë, që 45 minuta para fillimit të sfidës, ishte pozicionuar në një nga tribunat e stadiumit. Ai ka qenë si para ndeshjes, ashtu edhe në pushim apo pas saj, mes tifozëve, duke bërë foto me ta, ndërsa edhe këta të fundit nuk kanë kursyer koret për të.

Ultrasit e Granadës nisën koret “Uzuni qëndro” disa herë ndaj sfidës, duke bërë të qartë qëndrimin e  tyre, ndërsa po në kor kërkuan largimin e drejtuesve, të cilët i kanë premtuar përmirësimin e kontratës futbollistit, por nuk e kanë bërë realitet.

Pas ndeshjes që u mbyll me shifrat 0-0, trajner Fran Eskriba, la të kuptohej se tani priste që Uzuni të kthehej të ishte pjesë e skuadrës së tij.

“Shpresoj që të rregullohet gjithçka, pasi dua t’i kem të gjithë lojtarët të gatshëm. Por përtej kësaj, lojtari ka marrë një vendim dhe duhet të dijë pse e ka bërë. Ne kemi një rrugëtim që ndjekim. Ai që ndahet nga grupi, e vetmja gjë që duhet të bëjë është të kthehet të ecë në këtë rrugëtim nëse dëshiron të jetë pjesë e tij. Nuk do të ndryshojmë për askënd. Kjo është një temë e cila i përçan njerëzit. Duhet të kemi të qartë që ajo që na bashkon është stema që mbajmë. Të gjithë dum të njëjtën gjë, më të mirën për Granadan. Ia ndjejmë mungesën, por mua më mungojnë të gjithë ata që nuk i kam në dispozicion. Dera është e hapur, pasi duam që të marrë pjesë dhe ta bëjë mirë, siç ka bërë në të kaluarën”, tha trajneri i Granadës në fund të ndeshjes.