Pak ndryshime, një lëvizje në çdo repart. Si pritet të rreshtohet Vllaznia kundër Besës
Vllaznia përballet sot, në orën 17:00, me Besën në 1/8-at e kupës së Shqipërisë.
Ndeshja luhet në “Loro Boriçi” dhe kualifikimi për në çerekfinale të kupës vendoset vetëm nga ky takim, kështu që shkodranët mund të kenë lëvizje në formacion, por jo shumë. Trajneri Tomas Brdariç, siç pohoi edhe vetë, nuk do t’i lërë asgjë rastësisë, ndaj dhe në krahasim me formacionin e ndeshjes së fundit ndaj Tiranës do të ndryshojë pak gjëra, një lëvizje për çdo repart.
Në portë luan sërish Jukaj, i cili u shndërrua në “hero” ndaj bardhebluve me dy pritje vendimtare. Në mbrojtje pritet të luajnë Gurishta djathtas, Bajrami me Repajn në qendër dhe Çoba majtas. Në mesfushë Brdariç do të aktivizojë 3 futbollistë, të cilët me shumë mundësi do të jenë Sala, Qato dhe Kahrimanoviç.
Në krahun e djathtë të sulmit do ketë një ndryshim, me Malën që e nis nga stoli dhe vendin e tij e merr Delaj. Në të majtë do të jetë Dodaj dhe në qendër Bala.
