La Liga/ Barça “dehet” nga Superkupa, harron të fitojë në kampionat, Atletico ndal serinë e 15 fitoreve radhazi

Barcelona “dehet” nga suksesi i Superkupës dhe harron të fitojë në La Liga. Skuadra katalanase nuk shkoi më shumë se sa barazimi 1-1 ndaj Getafes, duke e çuar në 4 serinë e ndeshjeve pa fitore në kampionat. Kounde realizoi shumë shpejtë për të besuarit e Flick, teksa në minutën e 8, shfrytëzoi një pakujdesi brenda zonës dhe përfitoi duke shtyrë topin drejt rrjetës, për golin e avantazhit. Një gol që krijoi iluzionin se gjërat do të shkonin shumë mirë për katalanasit, por në fakt nuk do të rezultonte e tillë. Vendasit gjejnë barazimin me Arambarrin në minutën e 34. Skuadra e Barcelonës u hodh e gjitha në sulm në pjesën e dytë, për të kërkuar golin e fitores, por pa sukses. Jamal, De Jong dhe Raphina i’u afruan ndjeshëm golit, por fati nuk ishte me skuadrën e Flick, që ngec sërish në kampionat.

Por diferenca me kryesuesit e Atletico Madrid nuk ndryshon, kjo pasi kryesuesit e La Ligas, më herët të shtunën, dolën të mundur nga transferta përballë modestëve të Leganes. Të besuarit e Diego Pablo Simeones, marrin kështu një humbje të hidhur, teksa ndaj Leganes ndalin serinë e plotë 15 fitoreve radhazi në të gjitha kompeticionet.

Ndeshja nisi shumë mirë për “Los Cholchoneros” që goditën shtyllën me Julian Alvarez në minutën e 12. Në të 26 minutë do të ishte Griezmann që do të godiste sërish shtyllën e majtë pingule, me skuadrën madrilene që nuk kishte fatin me vete në këtë sfidë.

Befasia për miqtë do të vinte që në nisje të pjesës së dytë, teksa Leganes me anë të një goditje nga këndi befason madrilenët, me Nastasiç që me kokë gjen saktë topin dhe e dërgon në rrjetë.

Sfida komplikohet për Atleticon, megjithatë sulmuesi francez Antoine Griezmann e kishte sërish në këmbët e tij fatin për të evituar humbjen për skuadrën e tij, teksa në minutën e 90 gjyqtari akordoi një 11 metërsh për miqtë. Tek pika e bardhë Griezmann goditi shumë keq, duke konfirmuat ditën jo të tij dhe të Atleticos, që ndalen kështu në kampionat dhe mund të parakalohen nga Real, nëse këta të fundit fitojë sfidën e tyre të dielën.