Igli Tare: Lazio mund të shkojë larg, gara për Serie A e ashpër

Nga Lazio dhe deri tek opinioni për garën për titull në Serie A. Ish-drejtori sportiv i lacialëve, Igli Tare i tha të gjitha, në një intervistë për TMW.

Ku mund të arrijë Lazio?
Mund të shkojë shumë larg. Skuadra ka dhënë përgjigje të rëndësishme si në Europë, ashtu edhe në kampionatin italian, me disa ndalesa gjatë rrugës, por në përgjithësi është një sezon pozitiv. E rëndësishme është të qëndrojnë të përqendruar tek objektivi, sepse ndonjëherë rrezikohet të shkohet në drejtim të gabuar. Kjo skuadër ka shumë cilësi dhe, mbi të gjitha, një trajner shumë të përulur e të fokusuar te puna. Baroni po përpiqet të nxjerrë më të mirën nga të gjithë.

A është Baroni vlera e shtuar e Lazios?
Le të themi se ka sjellë shumë qetësi në një skuadër që po kalonte një moment të lëkundur, pas përfundimit të sezonit të kaluar. Ai ka qenë i aftë të ketë ndikim pozitiv si në rezultate, ashtu edhe në mënyrën e punës.

Keni punuar për vite me Simone Inzaghi. Si po shkon sezoni i Interit?
Inzaghi nuk është më një risi, nuk ka nevojë të shpjegohen më kampionatet e tij. Ai është një garanci, një nga 2-3 trajnerët më të mirë në Itali, por edhe në Europë ka bërë punë të shkëlqyer. Edhe këtë sezon po bën diçka të jashtëzakonshme, megjithëse ka pasur shumë probleme fizike në ekip.

A nënkupton kjo se ka pasur gabime në përgatitje?
Nuk aludoj për asgjë. Interi është një skuadër që luan çdo tri ditë me intensitet, kundër ekipeve të nivelit të lartë. Ata janë mësuar me këto situata, nuk është çështje përgatitjeje. Ndonjëherë ndodhin dëmtime dramatike, herë të tjera më pak. Flasim edhe për fatin, i cili është i rëndësishëm në një sezon.

Juventusi po vijon me shumë barazime. Mendimi juaj?
Ky është një projekt i drejtuar nga Giuntoli dhe Motta, ndodhin momente të tilla. Nëse punon te Juve, je i detyruar të bësh gjithçka shpejt, kërkohen përgjigje menjëherë. Kjo nuk ndihmon për projekte të tilla. Personalisht kam besim të madh në punën e Giuntolit, gjithashtu të Motta, një trajner me ide të qarta për mënyrën se si duhet të luajë një ekip. Ata mund të gjejnë zgjidhjet që kërkojnë për të dalë nga kjo periudhë. Natyrisht, barazimet janë shumë, por ndryshimi te Juve ka qenë i madh. Është normale të ndodhin disa ndalesa. Motta mund të bëjë një punë të rëndësishme me këtë skuadër.

Napoli, në krye të renditjes. Çfarë mendoni?
Mbërritja e Contes ka qenë një garanci. Kjo për mënyrën si punon, ngaqë është i përpiktë, jep shumë dhe kërkon shumë. Duke luajtur vetëm një ndeshje në javë, Napoli arrin ta përgatitë çdo sfidë në mënyrën më të mirë. Njëkohësisht duhet të nënvizojmë punën që ka bërë Conte deri tani. Edhe me disa ndalesa, gjithmonë kanë ditur të dalin nga vështirësitë. Do të jetë një garë kokë më kokë deri në fund mes Interit dhe Napolit për titullin.

Atalanta vazhdon të befasojë. Si e shihni rrugëtimin e saj?
Është kurorëzimi i punës së një grupi tashmë të konsoliduar, me një trajner që e njeh shumë mirë çdo detaj të projektit, dhe është në qendër të tij. Ai krijon sinergjitë e duhura për të pasur një skuadër konkurruese. Objektivi kryesor i Atalantës duhet të jetë kualifikimi në Champions League, gjithçka tjetër është arritje e madhe. Tani është një realitet i konsoliduar mes katër ekipeve më të mira të Serie A. Ky është rezultat i madh për një klub që ka bërë një rrugëtim të jashtëzakonshëm në dhjetë vitet e fundit. Deri në fund do të jetë gjithmonë protagoniste, edhe në Europë.

Roma ka shkarkuar De Rossin, më pas Juric, tani drejtohet nga Ranieri. Ç’mendoni?
Ranieri është një garanci, një simbol. Një njeri i respektuar jo vetëm nga tifozët, por nga i gjithë futbolli italian dhe botëror. Ai është me përvojë dhe do të japë një mbështetje të rëndësishme për rindërtimin e skuadrës sezonin e ardhshëm. Është një njeri kyç si këshilltar. Shikohet dora e tij, por Roma ende ka shumë për të rindërtuar, është ende një kantier i hapur. Me Ranieri kanë bërë një zgjedhje inteligjente, një njeri që di të menaxhojë presionet.

Dhe për Milanin? Një sezon me ulje-ngritje…
Zgjedhje e zgjuar ajo për të marrë Conceicaon. Ai është shumë kërkues, punon për çdo detaj dhe kërkon që skuadra të jetë shumë agresive. Në të ardhmen do të shihen rezultatet e punës së tij. Milani është shumë prapa në renditje dhe ende nuk bind në lojë, madje edhe të mërkurën në Champions fitoi me vështirësi. Sidoqoftë, klubi ka bërë një zgjedhje të drejtë duke sjellë në Itali një trajner me uri për sukses, por edhe me përvojë. Kjo është thelbësore për një grup lojtarësh me cilësi.