Krimi në Shkodër/ Ish-zyrtari i policisë së Shtetit: Kolë Manaj, ish-efektiv! Mendimi për të kryer vrasjen, i pjekur!
Ish-drejtuesi i lartë i Policisë së Shtetit, Arben Hajdarmataj, teksa komentuar tragjedinë që ndodhi sot në Shkodër, ku Kolë Manaj plagosi partneren e tij dhe vrau veten, e ka cilësuar këtë ngjarje si të mirë planifikuar nga 34-vjeçari.
Hajdarmataj tha se Kolë Manaj, ish-efektivi i policisë, ka shkuar të takojë bashkëjetuesen e tij, duke marrë dhe armën me vete.
“Mendimi për të kryer një krim ka qenë i pjekur, për më tepër që ish-efektivi i policisë ka shkuar tek partnerja me armën me vete”, tha ai, ndërsa shtoi se 34-vjeçari e ka goditur bashkëjetuesen e tij, Anila Prendushi, në kushtet e një tronditje të lartë psikike dhe më pas ka qëlluar edhe veten.
Sipas Hajdarmatajt, nëse konflikti është zhvilluar më parë dhe ka dijeni komuniteti, punonjësi i policisë ka për detyrë të marrë informacion.
Arben Hajdarmataj: Mendoj se ka qenë një konflikt i agravuar që nuk ka patur zgjidhje. Mendimi për të kryer një krim ka qenë i pjekur, për më tepër që ish-efektivi i policisë ka shkuar tek partnerja me armën me vete. Në momentin që janë konfliktuar, ai e ka goditur dhe në kushtet e një tronditje të lartë psikike, më pas ai ka vrarë dhe veten.
Nga ana e strukturave të policisë, këto ngjarje janë të vështira të ndalohen. Për më tepër nuk dihet se si një ish-punonjës policie e ka siguruar armën. Nuk e kemi në dorë mentalitetin, ajo është pjesë e shoqërisë, por unë e kam për policinë se në momentin që merr dijeni dhe për atë që ka urdhër mbrojtje, nëse konflikti është zhvilluar më parë dhe ka dijeni komuniteti, punonjësi i policisë ka për detyrë të marrë informacion.