Real “dhuron” primatin, humbja ndaj Betis i jep Atletico-s kryesimin në La Liga

Real gabon dhe Atletiko përfiton. Vetëm pak ditë nga përballja derbi mes njëra tjetrës për 1/8 e Champions League, Real gabon sërish duke u parkaluar nga rivalët e kryeqytetit në renditjen e përgjithshme të La Ligas.

Këtë herë ishte Betis që mposhti “Los Blancos” 2-1 me përmbysje. Në Bentio Villamarin, vendasit do të tregonin forcën e tyre duke i’a dal të merrnin një fitore me shumë vlera ndaj ekipit të Ancelotit. Ishin miqtë që e nisën ndeshjen më mirë, teksa zhbllokuan shifrat shumë shpejtë, falë golit të Brahim Diaz në minutën e 10. Johnny Cardoso do të rivendoste ekuilibrat në fushë, teksa pas një godtije këndi me kokë do të gjente rrjetën, duke mposhtur Courtois. Pjesa e dytë do të niste menjëherë me gol për Betis, kur në minutën 54 Isco do të transformonte saktë një 11 metërsh të fituar për skuadrën vendase. Ish mesfushori madrilen shënon dhe feston, por pas sfidën kërkoi menjëherë ndjesë, duke theksuar se Real Madrid për të mbetet gjithmonë në zemër.

Real u përpoq të ndryshonte rezultatin por pa sukses. Përfundimisht mbyllet 2-1 sfida në favor të Betis. “Dhuratë për Barçën” shkruan e përditshmja spanjolle “Sport” pas humbjes së “mbretërorëve”.

Megjithatë dhuratë kjo humbje ishte edhe për Atleticon e Madridit. Skuadra e Diego Simeones kaloi mes shumë vështirësisht Atheltic Bilbaon 1-0. Pjesa e parë ishte e ekuilibruar, me të dyja skuadrat që tentuan golin për zhbllokimin e rezultatit. Megjithatë do të ishte i përhershi Julian Alvarez që në minutën e 66 merr një assist pefekt nga Llorente dhe mposht portierin e miqve për golin e fitores. Në të 75 Bilbao pati shansin më të mirë për të barazuar teksa brenda të njëjtit aksion gjejnë shtyllën fillimisht e më pas traversën e portës së mbrojtur nga Oblak. Traversa do të tronditej sërish vetëm pak çaste më vonë pas goditjes së Inaki Williams, por madrilenë duket se kanë fatin me vete në këtë mbrëmje. Përfundimisht skuadra e Simeones fiton 1-0 dhe merr për momentin kryesimin e La Ligës me 56 pikë.