Kaosi në Kuvendin e Serbisë, deputeti shqiptar publikon momente nga salla e mbushur me tym prej flakadanëve dhe gazit lotsjellës
Deputeti shqiptar në Kuvendin e Serbisë, Shaip Kamberi, ka publikuar bë rrjetet sociale momentet nga kaosi që u krijua në kuvend, ku opozita hodhi gaz lotsjellës, vezë dhe tymuese për të penguar zhvillimin e seancës plenare.
“Opozita me gaz lotsjellës, vezë po tenton të pengojë mbajtjen e Seancës. Brnabiq insiston në vazhdim nën sallën e mbushur me gaz lotsjellës”, ka shkruar ai krahas videos.
Kujtojmë se gjatë seancës së sotme plenare në Kuvendin e Serbisë, deputetët e opozitës u ngritën nga ulëset dhe aktivizuan mjete piroteknike në sallë, me tym të kuq dhe të zi dhe shpalosën një pankartë ku shkruhej “Serbia po ngrihet për të rrëzuar regjimin”.
Mediat në Serbi bëjnë me dije se nga episodet e dhunshme në Kuvend kanë mbetur të lënduara tre deputete, njëra prej tyre është 8-muajshe shtatzënë.
Reagimi i tyre erdhi pasi deputetët e koalicionit qeverisës miratuan rendin e ditës, të cilin opozita e kundërshtoi.
Qeveria miratoi paraprakisht rendin e ditës ku përfshiheshin edhe ndryshimet në Ligjin për Arsimin e Lartë. Këto të fundit janë kërkesë e studentëve që protestojnë në Serbi, që nga shembja vdekjeprurëse e një strehe në Stacionin Hekurudhor të Novi Sadit, më 1 nëntor të vitit të kaluar.
