Arrestohet në Beograd nënkryetari i Partisë Demokratike të Socialistëve, deputeti Ivan Vukoviç

Ivan Vukoviç, nënkryetar i Partisë Demokratike të Socialistëve (DPS) dhe deputet i parlamentit të asaj partie në Mal të Zi, u arrestua në Beograd.

Ai është ndaluar nga Agjencia për Siguri dhe Informim (BIA) e Serbisë, raporton media malazeze Vijesti.me.

Raportohet se ai u arrestua nga BIA, teksa po dilte nga hoteli Hilton.

Një burim i “Vijesti” i cili ishte i pranishëm në paraburgimin e Vukoviçit tha se para ashensorit i kanë pritur disa persona me uniformë dhe dy me rroba civile, të cilët janë prezantuar si anëtarë të BIA-s dhe e kanë ndaluar atë.

Vukoviç u tha atyre se ai ishte në Beograd për të shoqëruar një anëtar të familjes që ishte atje për arsye shëndetësore.

Ai u shpjegoi se do të ktheheshin në Mal të Zi, por megjithatë e kanë ndaluar.

DPS tha për “Vijesti” se nuk i dinin detajet e vendndodhjes aktuale të Vukoviçit dhe se aktualisht po tentojnë të punësojnë një avokat.

Vukoviç mbrëmë ka shpërndarë në faqen e tij në Facebook një video nga protesta në Beograd.