Kombëtarja U-21 luan miqësoren ndaj Luksemburgut në “Stade Georges Wohlfart”
Kombëtarja shqiptare U-21 luajti sot ndeshjen e dytë miqësore ndaj Luksemburgut U-21. Sfida e luajtur në transfertë, në stadiumin “Stade Georges Wohlfart”, u mbyll me fitoren minimale të Luksemburgut 1-0.
Trajneri Alban Bushi e nisi me këtë formacion titullar ndeshjen ndaj Luksemburgut: Aron Jukaj (GK), Ermir Selimaj, Elton Fikaj, Ervin Bashi, Zylyf Muca, Gabriel Ramaj, Luan Simnica, Feta Fetai (C), Renaldo Torraj, Ermir Rashica dhe Dion Ajvazi.
Ndeshja ishte e luftuar nga të dyja ekipet, por pjesa e parë nuk prodhoi asnjë gol dhe u mbyll në barazim 0-0.
Goli i vetëm i takimit u realizua në fraksionin e dytë, me Luksemburgun që gjeti rrugën e rrjetës në minutën e 56-të.
Kuqezinjtë tentuan të barazonin rezultatin dhe krijuan disa raste të mira shënimi, por mungoi saktësia e duhur. Në fund, sfida u mbyll me shifrat 1-0.
Miqësoret e muajit mars ndaj Greqisë U-21 dhe Luksemburgut U-21 shërbyen për të testuar dhe vëzhguar gjendjen e lojtarëve të grumbulluar.
