Dosja ‘Buka’/ GJKKO pranon kërkesën e SPAK, zgjat me 3 muaj hetimet ndaj ish-zv.kryeministrit Arben Ahmetaj
Gjykata e Posaçme (GJKKO) ka pranuar kërkesën e SPAK për zgjatjen me tre muaj të hetimeve ndaj ish-zëvendëskryeministrit Arben Ahmetaj, lidhur me dosjen “Buka sha”.
Gazetarja Klodiana Lala bën me dije se seanca e radhës është caktuar të mbahet më 2 korrik 2025.
Arben Ahmetaj akuzohet nga SPAK se ka shpërdorur detyrën duke favorizuar privatizimin nga biznesmeni Lirim Fezollari të shoqërisë “Buka sha”, ku tashmë ndodhet kompleksi ‘Emerald’ tek rruga “5 Maji” në Tiranë, në zonën e “Medresesë”.
Familja Myderizi ngriti padi ndaj ish-zv.kryeministri për shpërdorim detyre për privatizimin e shoqërisë Dosja “Buka” sh.a.
Ahmetaj akuzohet se ka shkaktuar dëm 7 miliardë lekë për familjen Myderizi, e cila ka fituar proceset gjyqësore. Sipas akuzës, Ahmetaj në cilësinë e ish-ministrit të Financave ka vendosur privatizimin dhe në pronën e familjes Myderizi është ngritur një kompleks pallatesh.
Ndaj Arben Ahmetajt ka një urdhër-arresti ndërkombëtar me masë dhënë në mungesë “Arrest në burg” për veprat penale: “Korrupsion”, “pastrim parash” dhe “fshehje pasurie”.
