Kërkohet finalja pas 21 vitesh, Partizani i ka të gjithë gati ndaj Egnatias

Partizani ka lënë pas fitoren me Laçin dhe tashmë duhet të mendojë për Kupën, ku nesër e pret Egnatia në Rrogozhinë në funksion të gjysmëfinales së Kupës. Skuadra ka rikuperuar tashmë energjitë e humbura dhe dje ka nisur edhe planin taktik për të përballuar sa më mirë kampionët në fuqi.

Të kuqtë, Kupën e kanë vendosur në objektiv këtë sezon, aq më shumë prej faktit se është një trofe i munguar prej 21 vitesh. Lajmi i mirë është se trajneri Gega do t’i ketë të gjithë lojtarët në dispozicion.

Të vetmet shqetësime janë ato të Bintsukës dhe Eleke, që kanë disa shqetësime të vogla muskulore dhe mjekët do të bëjnë maksimumin që t’i eliminojnë deri nesër.

Mungesa e ndonjërit prej tyre do të ishte problem mjaft i madh për të kuqtë, por premisat më të mëdha janë që të dy të startojnë nga minuta e parë.