Saka rikthehet me gol, Arsenal fiton derbin ndaj Fulham dhe konsolidon vendin e dytë

Arsenal mund Fulham e fiton kështu derbin londinez ndaj Fulham 2-1 të zhvilluar në “Fly Emirates”. Skuadra e drejtuar nga Mikel Arteta ishte dominuese në fushën e blertë, teksa nuk e vuri në dyshim për asnjë moment marrjen e 3 pikëve.

Sfida do të zhbllokohej  në minutën e 37, teksa mesfushori spanjoll Merino godet nga brenda zonës me sferën që do të devijohej nga një mbrojtës kundërshtar, duke mposhtur portierin Leno për golin e avantazhit. Me rezultatin 1-0 do të mbyllej edhe pjesa e parë.

Në pjesën e dytë sërish “topçinjtë” do të ishin superior në fushën e lojës. Timber kombinon mjaft mirë me mesfushorin Odgard, por trekëndëshi nuk mbyllet me sukses, me portierin mik që devijon goditjen e anësorit.

Në minutën e 66 i gjithë publiku në “Emirates” ngrihet në këmbë, për të përshëndetur rikthimin në fushë të sulmuesit 23 vjeçar Bukayo Saka, që lë pas dëmtimin që e mbajti sulmuesin e kombëtares angleze larg fushave për gati 3 muaj. Dhe rikthimi i Saka do të ishte më i miri i mundshëm, pasi vetëm 7 minuta lojë do t’i mjaftonin atij për të gjetur golin. Një harkim nga e majta i Martinellit dhe Saka në shtyllën e dytë nuk fal për golin e dytë.

Në kohën shtesë goli i Rodrigo Muniz për miqtë shërbeu vetëm për statistikë, me Arsenal që falë këtij suksesi ruan vendin e dytë me 61 pikë. Shpresat për titull janë minimale, pasi vetëm një mrekulli mund të bëjë që “topçinjtë” të përmbysin disavantazhin e pikëve me kryesusesit e Liverpool.

“Saka rikthehet me gol”, ishte ky titulli kryesor i Daily Telegraph ditën e sotme, që i kushton hapësirën kryesore rikthimit të sulmuesit anglez nga dëmtimi, ku gjeti madje edhe golin pas vetëm 7 minutash lojë.