“BE do të kundërpërgjigjet!”- Macron thirrje bizneseve franceze pas tarifave nga Trump: Ndaloni financimet në SHBA! S’ka kuptim të investoni ndërkohë që sulmojnë Evropën
Presidenti Emmanuel Macron, ka shprehur besimin se Bashkimi Evropian duhet të përgatisë një përgjigje të fortë ndaj Shteteve të Bashkuara me tarifa të reja tregtare, sipas Bloomberg, duke cituar burime të afërta me Macron.
“Presidenti francez Emmanuel Macron beson se Bashkimi Evropian duhet të përgatisë masa kundërpërgjigjeje, për shembull, duke synuar teknologjitë dhe shërbimet amerikane,” shkruan agjencia, duke cituar individë që njohin mendimin e tij.
Parisi dëshiron të sigurojë që përgjigja e BE-së ndaj tarifave amerikane të përdorë të gjitha mjetet e bllokut për të mbrojtur interesat e tij, shtoi një nga burimet.
Ndërkohë, Macron ka një takim të premten pasdite me përfaqësues të sektorëve të ekonomisë franceze që preken nga tarifat amerikane. Në këtë takim marrin pjesë, ndër të tjera, biznesmenë nga industria e hapësirës ajrore, bujqësia, vera, kimikatet, elektronika dhe metalurgjia.
Në fillim të takimit, presidenti francez e quajti vendimin e presidentit amerikan “të dhunshëm dhe të pabazuar”, duke folur për ndikimin kolosal të tarifave në Francë dhe territoret e saj të largëta dhe në Europë në përgjithësi.
Gjithashtu, ai inkurajoi bizneset franceze të ndërpresin investimet në SHBA. “Nuk ka kuptim që bizneset të investojnë atje, ndërkohë që SHBA po sulmon Evropën,” tha presidenti francez.
Po ashtu, ai theksoi se është dakord me qëndrimin e liderëve të BE-së që “asgjë nuk mund të përjashtohet” si përgjigje ndaj veprimit të Trump, pasi “të gjitha mjetet janë në tryezë”.
“Ne duhet të bëjmë gjithçka që është efektiv dhe proporcional, por që gjithashtu tregon qartë se jemi të vendosur të mos lejojmë që këta sektorë të bëhen viktima të këtyre tarifave,” theksoi ai.
