Të pengosh kthesën politike, si të mbash Shqipërinë peng

NGA PROF. EDMOND PANARITI 

Çfarë ndodh kur një kastë politike pengon rotacionin dhe e fut vendin në një ngërç ndryshimi? Ndodh betonimi i pushtetit me llaçin e korrupsionit. Sepse të njëjtët njerëz dhe grupe interesash vazhdojnë të mbajnë kontrollin e vendit, duke çimentuar lidhjet nepotike, rrjetin e favoreve dhe të korrupsionit. Kjo ndodh sepse edhe mbajtja e përgjegjësisë dhe llogaridhënia venitet, ndërsa arroganca dhe mospërfillja e kastës drejtuese rritet.

Ndodh që vendoset duke i anashkaluar ligjet, sepse parapëlqehet që të qeveriset me akte normative, me urdhra dhe udhëzime. Sepse preferohet që të përthyen dhe të përshtaten ligjet, për interesat e grupit sundues. Vetë procesi i hartimit dhe i miratimit të ligjeve u nënshtrohet interesave të ngushta dhe jo atyre publike. Ndarjet, përçarjet dhe polarizimi politik midis kaheve të kundërt arrin kulmin. Vlerat demokratike të shoqërisë minohen dhe rrënohen. Vetë qytetarët bëhen më agresivë dhe më pak tolerantë ndaj pikëpamjeve të ndryshme, duke thelluar dhe ashpërsuar hendekun social të vendit. Vendi mbyllet ndaj ndryshimeve shndërruese dhe transformuese dhe mbetet i pandjeshëm ndaj rrethanave, kushteve dhe ideve të reja.

Dhe së fundi mbajtja peng e kthesës politike ushqen një pellg jo demokratik me ujëra të ndenjura, të cilat rritin padrejtësitë, pengojnë përparimin dhe gjithë përfshirjen. Për këtë arsye, edhe përtej bindjeve politike, këto duhet të mbajmë parasysh kur të zgjedhim.

/Gazeta Panorama