Bilanc “lufte” te Bayern, edhe Musiala mungon ndaj Inter, e konfirmon drejtori Eberl (VIDEO)

Bayern Munich triumfoi 3-1 ndaj Augsburg duke mbajtur larg rivalin e tij kryesor, Bayer Leverkusen. Ekipi i Kompany doli me 3 pikë pas suksesit me përmbysje, në një kohë kur e gjetën veten në disavantazh në minutën e 30-të. Në fundin e pjesës së parë ishte Musiala ai i cili rikthehu baraspeshën. Me fillimin e pjesës së dytë, vendasit mbeten më 10-të lojtarë, ndërsa një minutë më pas Harry Kane me kokë përmbysi rezultatin duke kaluar Bayern në avantazh.

Për të mbyllur llogaritë me Augsburg mendoi Sane i cili me një goditje të fortë gjeti një devijim të lehtë duke realizuar golin e tretë për Bayern në kohën shtesë.

Falë këtij suksesi, Bayern qëndron i qetë në krye në kuotën e 68-të pikëve, por kjo ishte një fitore me shumë kosto pasi Jamal Musiala doli nga fusha i dëmtuar duke humbur në këtë mënyrë sfidën kundër Inter në Champions, fakt që e pranoi edhe drejtori i klubit, Max Eberl:

“Musiala nuk do të jetë të martën kundër Inter. Ndjeu dhimbje pas kofshës, nuk duket një gjë e lehtë”, u shpreh Eberl.

Ndryshe nga drejtori i Bayern, trajneri Kompany shpreson ende: “Të presim dhe të shohim pasi nuk është ende e qartë shkalla e dëmtimit. Nëse nuk do të jetë kundër Inter do të përpiqemi ta plotësojmë me lojën si skuadër”, u shpreh Kompany.

()