“Duke bërë ecejake mbrëmjeve në rrugën Myslym Shyri deri pas mesnate…”- Kryeministri rrëfen bisedat me Kryepeshkopin e ri në vitet ’80! Hirësi Joan: Ja kur vendosa të bëhem prift

Kryeministri Edi Rama ka treguar njohjen me Kryepeshkopin e ri të Kishës Ortodokse Autoqefale të Shqipërisë, teksa Hirësi Joan Pelushi ishte i ftuar në podkastin e tij “Flasim”.

Kreu i qeverisë tregoi se ka një njohje shumë të vjetër me Kryepeshkopin Joan, teksa rrëfeu se bisedonin së bashku për fenë mbrëmjeve në rrugën Myslym Shyri deri pas mesnate në vitet ’80

“Ju kishit një fjali shumë të thjeshtë kumbuese, që unë do të bëhem prift”, iu drejtua Rama.

Ndërsa Kryepeshkoi Joan zbuloi se kur e mori këtë vendim: “Kur lexova për herë të parë Ungjillin, në vitin e 4 të gjimnazit ndodhi diçka thellë brenda meje. Bindja për t’u bërë prift dhe për t’i shërbyer Zotit lindi atëherë”.

Edi Rama: Ne kemi njohje shumë të vjetër dhe kemi folur për këto tema duke bërë ecejake mbrëmjeve në rrugën Myslym Shyri deri pas mesnate, flitet për vitet 80 dhe as nuk mendohej që ne do të dilnim në botën e lirë dhe do të kishim lirë të praktikonim fenë.

Ju kishit një fjali shumë të thjeshtë kumbuese, që unë do të bëhem prift. Faktikisht ndodhi por arsyeja përse e solla këtu është se kurrë nuk patëm mundësi të flisnim me të njëjtën liri, nga vinte ajo siguri?

Kryepeshkopi Joan: Unë vij nga një familje shumë e madhe dhe jo e krishterë, në atë kohë nuk praktikohej asnjë lloj besimi. Nuk ishte konvertim.

Kur lexova për herë të parë Ungjillin, në vitin e 4 të gjimnazit ndodhi diçka thellë brenda meje. M’u kthye sërish gëzimi i fëmijërisë. Falenderova Zotin. Në atë çast jeta ime ndryshoi. Jo vetëm që lexova Ungjillin, por pata fatin të njihesha edhe me njerëz që kishin akses në libra të tilla. Bindja për t’u bërë prift dhe për t’i shërbyer Zotit lindi atëherë. Në atë kohë të bëheshe prift, ishte e paimagjinueshme.