E përplasi makina, humb jetën në spital 65-vjeçarja! Policia në kërkim drejtuesin e mjetit

Ka ndërruar jetë në spital, 65-vjeçarja e cila u përplas pasditen e sotme me mjet, në fshatin Bulgarec të Korçës.

Policia ka arritur të identifikojë dhe ka shpallur në kërkim drejtuesin e mjetit, i cili pasi përplasi 65-vjeçaren u largua me shpejtësi nga vendngjarja.

Njoftimi i policisë:

Përplasi me automjet një 65-vjeçare dhe u largua nga vendi i aksidentit, pas ndjekjes intensive dhe kontrolleve nga Policia, indetifikohet dhe shpallet në kërkim drejtuesi i automjetit, shtetasi G. M., 27 vjeç, banues në Dërsnik.

Specialistët e Sektorit të Qarkullimit Rrugor pas kontrolleve intensive të bëra dhe vëzhgimit të kamerave në zonën ku ndodhi aksidenti kanë bërë të mundur indetifikimin e automjetit dhe drejtuesit të tij, i cili  u largua nga vendi i aksidentit. Rreth orës 17:40, në fshatin Bulgarec, ky shtetas, me automjetin që drejtonte, përplasi shtetasen S. Q., 65 vjeçe, këmbësore, e cila si pasojë e plagëve të marra ka ndërruar jetë në spital.

Vijon puna për kapjen e 27 vjeçarit.

Materialet procedurale do t’i kalojnë Prokurorisë, për veprime të mëtejshme.