Pazar apo ndershmëri? Superiorja me “laps e letër”, llogari për mbijetesën

4 javë përpara fundit, 5 nga 10 ekipet e Superiores janë me “laps e letër” në dorë duke bërë llogari, me shpresën që të luhet drejtë apo të gjejnë aleatë në mënyrë që të mbijetojnë në elitë. Në mënyrë të pa pritur në këtë valle e sheh veten edhe Tirana, me bardheblutë që mbyllin tabelën në vendin e fundit. Derbi i fundit për këtë sezon, sfida kundër Partizanit pritet të vendos jo pak mbi fatin e tyre për të mbijetuar këtë sezon. Ky ishte skenari më i hidhur që mund t’i rezervonte fati, pasi ndaj Partizanit nuk është kurrë e lehtë në një kohë kur nuk njohin fitore në derbi prej 10 ndeshjesh radhazi. Për të ndërlikuar pozitat e tyre është edhe fakti që të kuqtë janë në garë për të siguruar një vend në “final-four” pasi ndjejnë nga pranë presionin e Elbasanit.

Lajmi i vetëm pozitiv për Tiranën është fakti se nga vendi i fundit ku ndodhen diferenca me Teutën e vendit të 6-të është vetëm 2 pikë, plus që java e 33-të sjell përplasje direkte mes ekipeve që luftojnë për mbijetesë, si në rastin e Laçi-Skënderbeu. Ekipi kurbinas ka vendosur të hap dyert e stadiumit për këtë takim, por nuk mungoi dhe një thumbim në distancë ndaj ekipit të Gjokës duke shtuar se luajnë ndaj atyre që dinë të marrin 3 pikë vetëm kur i hapin portën. Laçi dhe Skënderbeu ndodhen në kuotë të njëjtë pikësh, 33.

Mbetet për t’u parë se si do të reagojnë dy ekipet e tjera si Dinamo dhe Vllaznia. Ekipi i Ilir Dajës pret Teutën të dielën, por sfida e tyre e fundit ndaj Skënderbeut ka lënë një shije të hidhur. Në ethet e mbijetesës është edhe Bylis, me ekipin ballshiot që pret Vllazninë këtë fundjavë, një skuadër që ashtu si Dinamo praktikisht e ka siguruar prezencën në “final-four” dhe janë të angazhuar në Kupën e Shqipërisë ku luajtën aktin e parë në mesjavë. Një sfidë e bukur për t’u parë, të paktën në letër është ajo ndërmjet Egnatias dhe Elbasanit.

“Pazar apo ndershmëri? Të dielën nisin 4 javët vendimtare për Kategorinë Supeiore. A do të ketë marrëveshje mes klubeve…”shkruan Panorama Sport, gazeta më e madhe sportive në vend.

()