Organizimi i “Eagle Cup” në Shqipëri, Presidenti Duka: Turne prestigjioz, ju siguroj se do të jetë përvojë fantastike
Shqipëria do të mirëpresë në muajin qershor një nga ngjarjet më të rëndësishme të futbollit për të rinjtë, turneun ndërkombëtar “Eagle Cup”, ekskluzivitet i njohur i “Viareggio Cup”. Ky event historik do të zhvillohet nga data 8 deri më 15 qershor dhe do të mbledhë në vendin tonë 12 ekipe nga e gjithë bota.
Organizimi i këtij turneu vjen falë bashkëpunimit të Federatës Shqiptare të Futbollit me fondacionin “Albitsol ”, Universitetin e Sporteve të Tiranës dhe Centro Giovani Calciatori Viareggio (CGC Viareggio), organizatorët e “Viareggio Cup”.
Turneu u prezantua sot në “Shtëpinë e Futbollit”, gjatë një konference për media ku morën pjesë Presidenti i FSHF-së Armand Duka, përfaqësuesja e fondacionit “Albitsol”, Vasenka Rangu Leka, rektori i Universitetit të Sporteve të Tiranës Agron Kasa, si edhe përfaqësues të CGC Viareggio.
Në fjalën e tij përshëndetëse, Presidenti Duka u shpreh i kënaqur për organizimin e këtij turneu dhe e shikon si mundësi të mirë zhvillimi për futbollin shqiptar dhe për vendin. Ai garantoi partnerët se FSHF-ja do të bëjë maksimumin për të organizuar një turne fantastik në muajin qershor.
“I uroj mirëseardhjen, rektorit të Universitetit të Sporteve dhe drejtueses së fondacionit “Albitsol”. I falënderoj për bashkëpunimin me FSHF-në në organizimin e këtij turneu prestigjioz në të gjithë botën e futbollit. Të gjithë e kemi dëgjuar turneun e Viareggio-s, madje ekipet shqiptare e kanë ëndërruar të jenë pjesë e këtij turneu.
Sot ky turne vjen dhe do të zhvillohet në Tiranë, nga 8-15 qershor, në një periudhë kur ne kemi përfunduar Kampionatin Europian U-17, në një periudhë ku nuk ka shumë aktivitet futbollistik në Shqipëri. Do të jenë katër ekipe shqiptare. Jam i sigurt që kjo është risi për ne dhe zhvillim për vetë futbollin, shans për ata që do luajnë, shans për ata që do ta ndjekin, por edhe për ekonominë shqiptare dhe zërin që ajo i jep në tregun ndërkombëtar Shqipërisë.
I garantoj drejtuesit e turneut, rektorin dhe drejtuesen e Albtisol që ne do të bëjmë një turne fantastik, në nivelet më të larta të organizimit, në nivelet siç FSHF di t’i bëjë, siç ka bërë dhe shumë turne të tjera. Jam i sigurt që do të kthehet në një traditë në të mirë të futbollit të Shqipërisë. Uroj fillimin e mbarë, të shkojë mbarë dhe të gjithë ata që do të vijnë, të rikthehen në Shqipëri dhe në futbollin shqiptar në veçanti”, – tha Presidenti Duka në fjalën e tij.
Drejtuesja e fondacionit “Albitsol ”, Vasenka Rangu tha në fjalën e saj se ky turne do të jetë një panoramë shumë e mirë për të rinjtë. Ajo falënderoi Presidentin Duka dhe FSHF-në për bashkëpunimin në këtë nismë.
“Është kënaqësi të jem në “Shtëpinë e Futbollit” si një nga nismëtaret e këtij turneu që po vjen në Shqipëri falë këtij bashkëpunimi, ku do t’i përkushtohemi talenteve të reja. Dua të falënderoj Presidentin e FSHF-së, Armand Duka, i cili na dha besimin e tij në këtë nismë, na inkurajoi dhe në emër të fondacionit, dua të them që jemi mirënjohës. Jam e lumtur të gjendem në këtë ambient dhe kemi nderin që jemi të përfaqësuar nga një president i cili po na nderon në nivel ndërkombëtar me këtë vizion të jashtëzakonshëm. Falë figurës tuaj, ne ndihemi të angazhuar të ndërmarrim nisma të tilla dhe të rikthehemi në vendin tonë. Një falënderim edhe për Viareggion, për këtë mundësi. Për herë të parë po del nga Italia dhe po vjen te ne, në këtë bashkëpunim. Ky projekt vjen falë një partneriteti me Universitetin e Sporteve dhe FSHF-në. Ky turne do të jetë një panoramë shumë e mirë për të rinjtë. Nuk do të jetë thjesht një kompeticion, por një mënyrë për t’u takuar me klube të tjera që do të vijnë në Tiranë. Ky turne do të jetë një mesazh shumë i mirë për të gjithë botën, ku ne do të japim mesazhin që Shqipëria është shtëpia e talenteve të reja. Ju ftojmë të na ndiqni në qershor”, – tha Vasenka Rangu.
Edhe Agron Kasa, rektori i Universitetit të Sporteve në fjalën e tij tha se pa mbështetjen e FSHF-së, realizimi i këtij turneu do të ishte i pamundur. Kjo për shkak të eksperiencës, infrastrukturës, dinamikës dhe shumë elementeve të tjera që FSHF-ja ka.
“Kemi një vit që po punojmë për këtë turne dhe jam i bindur në suksesin e saj. Pa mbështetjen e Presidentit Duka dhe FSHF-së, ishte në kufijtë e të pamundurës për t’u bërë. Sepse kërkohet eksperiencë në këtë punë, dinamikë, infrastrukturë, shumë elementë që FSHF-ja është e konsoliduar për organizimin e këtyre aktiviteteve. UST-ja i është bashkuar kësaj lëvizje për të bërë diçka ndryshe nga çka ndodhur deri më tani. Ky aktivitet i madh është një lloj ingradimi dhe sinergjie e përbashkët ku të gjithë kemi çfarë të fitojmë. Me Presidentin Duka kemi bërë një marrëveshje më parë dhe jam i lumtur që aktivitetet po bëhen më të rëndësishme, më impenjative, me përgjegjësi më të madhe. Kam të gjitha arsyet për të falënderuar Presidentin Duka, FSHF-në që duke bashkëpunuar në kuadër të asaj marrëveshje që kemi bërë më përpara, UST-ja ka gjetur rrugën për t’u orientuar drejt sportit elitar, në mënyrë të veçantë futbollit. Do të jenë 12 skuadra dhe 24 ndeshje në harkun kohor të 6 ditëve dhe ekipi kampion do të përballet me ekipin kampion të Viareggio-s. Jam i bindur që në Shqipëri do të ketë një efekt shumë të madh” – tha rektori Kasa.
Konferenca për media u përshëndet edhe nga ish-kampioni i botës me Italinë, Fulvio Collovati, koordinatori dhe Drejtori Teknik i “Eagle Cup”, Enzo Gambaro dhe ish-futbollisti i italian, Alberto Bigon, të cilët vlerësuan organizimin e këtij turneu për herë të parë në Shqipëri dhe punën që po bën FSHF për mbështetjen e futbollit për të rinjtë.
