Tirana, Shehi: Asgjë nuk është e pamundur, Tirana synon përmbysjen ndaj Besiktas

Asgjë nuk është e pamundur. Kjo është motoja me të cilën skuadra e Tiranës do të futet nesër në fushë. Trajneri i bardhelube, Orges Shehi ka dalë në konferencën e zakonshme për shtyp, në prag të ndeshjes së kthimit të turit të dytë të Conference League ndaj Besiktas (3-1 ndeshja e parë për turqit).

“Do të kërkojmë të jemi në vazhdën e ndeshjeve të fundit, edhe pse jemi koshientë që kemi përballë kundërshtar të fortë. Ta nisim ku e lame në ndeshjen e parë

Shpresoj që të kemi një skuadër me ekuilibër, sepse ekuilibri është shumë i rëndësishëm përballë kundërshtarëve të tillë. Sigurisht që ndeshjet më pas vendosen nga episode.

Ekipe me buxhete të tilla është më mirë t’i përballësh më vonë. Me përvojën që kam unë, është hera e parë që përballemi me kundërshtar të nivelit të tillë.

Do të futemi në fushë për të dhënë më të mirë, me synimin për ta kthyer rezultatin. Shanset varen nga situatat që do të krijohen gjatë lojës, që të afrojnë apo të të largojnë nga objektivi” – tha ai. Tirana do përballet me turqit të enjten, në orën 20.00, në Air Albania.

()