Ter Stegen bën sakrificën për Barcelonën, ul pagën e tij dhe rinovon zyrtarisht deri në vitin 2028

Portieri gjerman Marc Ter Stegen duket se do të pensionohet te Barcelona. Në moshën 31 vjeçare ai nënshkroi kontratën e re me Barcelonën këtë të premte. Portieri e zgjat angazhimin e tij me blaugranat edhe për tre sezone të tjera, deri në vitin 2028.

Gjermani shkoi në zyrat e “Camp Nou” për të nënshkruar marrëveshjen së bashku me presidentin Joan Laporta, zëvendëspresidentin sportiv Rafa Yuste, zv. presidenti, Eduard Romeu, menaxherin Joan Soler dhe drejtorin sportiv, Deco.

Synimi ka qenë që në fillim që rinovimi të mbyllej para përfundimit të merkatos verore. Dhe kështu ka ndodhur, sepse portieri reduktoi një pjesë të pagës së dy viteve të kontratës që i kishin mbetur dhe tri të tjerat që nënshkroi këtë të premte.

Pra, paga e tij është ulur ndjeshëm, një sakrificë e bërë në kushtet e vështira ekonomike të klubit katalanas. Po kështu, nga Barcelona konsiderojnë se ky reduktim do të shërbejë për të regjistruar ndonjë futbollist tjetër në pritje.

Laporta shpreson se tashmë La Liga, pasi të analizojë kontratën e re të Ter Stegen, do t’i japë dritën jeshile regjistrimit të Iñaki Peña. Ai mund të jetë i disponueshëm për Xavi Hernández që në ndeshjen kundër Villarrealit. Ter Stegen, i ardhur në vitin 2014 nga Borussia Monchengladbach, sapo ka nisur sezonin e tij të dhjetë në radhët e Barcelonës dhe me meritë është kapiteni i dytë i skuadrës blaugrana.

Gjatë gjithë kësaj kohe ai ka luajtur 379 ndeshje. Për të gjitha këto, i përshtatur dhe duke qenë një pjesë e rëndësishme në dhomat e zhveshjes, gjermani ka dashur të bëjë një hap tjetër në reduktimin e pagës për ta ndihmuar sërish klubin.

Ideja e tij ishte ta zgjaste kontratën deri në “Euro 2028”, kur do të jetë 36 vjeç. Me këtë rinovim të fundit, Marc, i përshtatur totalisht me kulturën katalanase, do të përmbushë një nga objektivat e tij, ta mbyllë praktikisht të gjithë karrierën e tij te Barcelona. Dhe nuk e mbyll derën për të vazhduar për më shumë vite, nëse ndihet ende i fortë.

()