Vuçiç: Kurti bëri një truk të mirë dje, por do të jetë jetëshkurtër

Presidenti i Serbisë, Aleksandër Vuçiç, ka folur sot për takimin në Bruksel me liderët e vendeve të BE-së dhe përfaqësues të lartë të unionit.

Siç pretendon kreu i shtetit serb, kryeministri Albin Kurti të enjten në Bruksel e ka provuar një “truk të mirë”, por që sipas Vuçiçit do të jetë “jetëshkurtër”.

Vuçiç ka thënë se Kurti ka ofruar idenë për të firmosur të tri dokumentet dhe sipas tij e ka bërë këtë meqë e ka ditur që Serbia s’do të pranonte.

“Kurti bëri një truk të mirë, por jetëshkurtër dje. E ka provuar më parë, por dje ishte hera e fundit që e nxori, sepse nuk mendoj se mund të kalojë më. I pari ishte një takim me krerët e BE-së dhe më pas me Borell dhe Lajçak. I ka paraqitur idenë, të firmosim të tre dokumentet. Bëhet fjalë për marrëveshjen e dytë, Bruksel, Ohër. E pranoi sepse e dinte që Serbia nuk do ta pranonte,” ka thënë Vuçiç për mediat serbe.

Sipas tij, Kurti nuk është i gatshëm të themelojë Asociacionin.

“Ai nuk do të përmbushë gjithçka, është e qartë se ishte një truk për të blerë kohë,” ka deklaruar Vuçiç./Gazeta Express