Vëllai i Fredi Belerit për mediat greke: Rama ka frik ta humbasi Himarën, falsifikimet do të dalin në dritë

Leonardo Beleri, vëllai i Fredi Belerit i cili është nën hetim nga SPAK për blerje votash në Bashkinë e Himarës, ka dhënë deklarata të forta për mediat greke, ku thotë se qeveria Rama nuk dëshiron të humbasë Heimarrën dhe se falsifikimet do të dalin në dritë.

“Qeveria dhe zoti Rama personalisht nuk duan të humbin bashkinë e Himarës. Sepse do të dalin në dritë shumë të vërteta. Ata vazhdojnë të bëjnë detyra dhe falsifikime. Festa vazhdon”, tha Leonardo Beleri për mediat greke.

Ai ka bërë një referencë të veçantë për qëndrimin e Jorgo Goros në detyrën e tij, i cili edhe pse u raportua se do të largohej, mohoi se ka dhënë dorëheqjen. “Zoti Goro nuk merr dot frymë nëse nuk merr leje nga zoti Rama”, tha Beleri, duke përsëritur sugjerimin e të vëllait që nëse nuk është vetë kryetar bashkie që është zgjedhur, atëherë postin duhet ta marrë një i zgjedhur tjetër nga fraksioni i tij.