SHBA për protestat në Beograd: Të respektohet vullneti i popullit
Ambasadori i Shteteve të Bashkuara të Amerikës në Serbi, Christopher Hill, ka reaguar pas protestës së dhunshme të opozitës atje para ndërtesës së Komisionit Republikan të Zgjedhjeve.
“Në orët dhe ditët në vijim, liderët e Serbisë dhe qytetarët e saj duhet të kujtojnë: Legjitimiteti i proceseve demokratike varet nga transparenca dhe nga gatishmëria e të gjitha palëve, fituese apo humbëse, për të respektuar vullnetin e popullit të shprehur në kutinë e votimit,” shkroi ai në platformën X.
Hill shkruan po ashtu se dhuna dhe vandalizmi ndaj institucioneve shtetërore nuk kanë vend në një shoqëri demokratike, derisa ka shtuar se “duke qenë se policia ruan rendin publik, ajo duhet të bëjë të pamundurën për të mbrojtur dinjitetin e qytetarëve dhe të drejtat civile”.
“Kam besim të plotë se Serbia do t’i kalojë këto sfida me demokracinë e saj të forcuar. Të gjithë qytetarët e Serbisë kanë të drejtë të dëgjohen për të shprehur pikëpamjet e tyre politike në mënyrë paqësore dhe pa përdorur dhunë,” thotë Hill.
In the hours and days ahead, Serbia’s leaders and its citizens should remember: The legitimacy of democratic processes depends upon transparency and on the readiness of all parties, winning or losing, to respect the will of the people as expressed at the ballot box.
— Ambassador Christopher R. Hill (@usambserbia) December 25, 2023
