NOTAT/ Rekorde dhe tabu, Araujo “skuq” Barçën, Mbappe rikthehet të “këndojë”, “gjeli” lojtari i ndeshjes

Në futboll statistikat janë bërë për t’u thyer, PSG thyen një tabu të madhe, për herë të parë në histori arrin të përmbys një ndeshje në Champions, përmbys as më shumë e as më pak, por Barcelonën, duke siguruar për herë të 4 një biletë për në gjysmëfinale. Ekipi i Xavi-t bën “vetëvrasje”, në një kohë kur kishin fituar 3-2 në Paris, ndërsa gjetën në avantazh që në minutën e 12-të, ku Raphinha dërgoi topin në rrjetë pas një assiti nga Yamal.

Sfida mori një tjetër rrjedhë pas minutës së 29-të, kjo e kushtëzuar shumë dhe nga kartoni i kuq i Araujo-s. Në fundin e pjesës së parë, një ish i urryer në Barcelonë, Dembele gjeti rrugën e rrjetës duke barazuar shifrat në 1-1.

Ekipi i Luis Enriques nuk u mjaftuan me kaq, por me fillimin e pjesës së dytë, Vitinha me një goditje të bukur nga distanca kaloi PSG në avantazh. Pjesën e mbetur të sfidës, Xavi e ndoqi nga tribuna, në një kohë kur gjyqtari i takimit e ndëshkoi më karton të kuq për protesta. Pas këtij momenti, stafetën e mori Kylian Mbappe.

Më në fund, “gjeli” më i famshëm u rikthye në nivele të larta, fillimisht u tregua i saktë nga pika e bardhë e penalltisë duke dërguar shifrat në 1-3. Në fund, në minutën e 89-të, Mbappe realizoi edhe golin e dytë personal, të katërtin për PSG, duke mbyllur llogaritë me Barcelonën.

Pas Thomas Muller me tetë gola, Mbappe bëhet lojtari që i ka shënuar më shumë gola Barcelonës në Champions, gjashtë. Mbappe shndërrohet në lojtarin që ka marrë pjesë në më shumë gola këtë sezon nga 5 kampionatet më të fortë në Evropë, 41 gola dhe 9 assiste. Lojtari më notën më të ulët në këtë sfidë rezultoi Araujo, 3,5, ndërsa lojtari më i vlerësuar Kylian Mbappe, nota 7,5, ndërsa sipas UEFA-s lojtari më i mirë ishte Dembele.

()