“Fëmijën tim, aq sa e dua, aq e shoh si burg”, Anila Hoxha publikon letrën e gruas së divorcuar pas dhunës: Kam menduar vetëvrasjen! Mundohem të ndihmoj veten, por…

Ajo ka treguar historinë e saj ku pas dhunës dhe problemeve në martesë, mori divorcin duke tentuar të rrisë e vetme fëmijën e saj. Në këtë letër ajo tregon se për shkak të vështirësive, ka menduar t’i japë fund jetës, por nuk e ka bërë duke menduar se duhet të rrisë fëmijën.

Hoxha e ka ndarë këtë letër, pasi e quan si një “thirrje!”.

Postimi i plotë i Anila Hoxhës:

Nje thirrje per ndihme, leter e gruas pa emer!

Jam menduar naten e kaluar ta botoj apo dhe vendosa qe ta ndaj sepse ja ku ESHTE nje thirrje. Per ti qendruar besnike hoqa shume fraza, te cilat mund ta identifikojne.

“Anilë, të pashë sot tek Juli dhe ende nuk i ndal dot lotët.

Ti më njeh por mua, më vjen turp të të them se kush jam, sepse nuk do doja që këtë mesazh ta ndaje me dikë tjetër. The që nuk jemi vetëm, por duhet të flasim.

Jemi vetëm!

Kam dalë nga një martesë, nga e cila u dhunova dhe me shumë sakrifica u përpoqa të vazhdoja jetën time dhe rritjen e fëmijës.

Nga jashtë duket sikur jam mirë.

Më kanë mbajtur me orë të tëra në punë kur unë duhej të shkoja pranë fëmijës tim, jam detyruar ta rris por nuk e kam marre pagën. 3 muaj pa paguar detyrimet, qiraxhiu po bëhet gati të më nxjerrë nga shtëpia dhe fëmijën e kam dërguar tek i ati.

Ndersa mua më qan shpirti, sepse nuk kam as një lek për ta ushqyer. Ai nga ana e tij po më bën presione indirekte se do ma marë kujdestarinë, sepse nuk kam financat e duhura.

Qeraja, fëmijët për tu rritur, me jetë për të përballuar, duken shumë.

Por nuk dalin kur ti e ke mësuar evlatin tënd duke mos i munguar asgjë. Dhe sot dhuna vazhdon, psikologjike, financiare, emocionale dhe kjo  bëhet zinxhir.

Alma dhe shumë si ajo nuk kanë rrugëdalje.

Unë luftova, por ndonjëherë mendoj më mirë të kisha qëndruar në atë martesë jo të shëndetshme, sesa të jem në kushtet e mbijetesës.

Dhe po, nuk kanë qenë të pakëta herët që e kam menduar vetëvrasjen, por nuk e bëj dot sepse më duhet të rris e të edukoj qënien më të rëndësishme të jetës time.

Aq sa e dua, aq e shoh atë si burgun tim. Më ka dënuar që të përballoj jetën në këtë vend të qelbur, me këta njerëz të kalbur, dhe realisht, nuk ka asnjë derë ku mund të trokasësh. Të gjithë duan të të mbështesin në teori, por në praktikë, edhe nëse e bëjnë, duan vetëm të të shkelin.

Ky është realiteti.

Na vrasin besimin tek drejtësia, tek e vërteta, tek dinjiteti, na vrasin ëndrrat dhe ti duhet thjeshtë të mbijetosh, ose të lejosh të të shkelin që të ia dalësh, sepse pa asnjë mbështetje, është e pamundur.

Te lutem, mos trego. E vetmja ndihmë që mund të japim të gjithë bashkë është të tregojmë të vërtetën. E vetme, jeta e asnjërës nuk ka vlerë.

Ky është realiteti. Po mundohem të ndihmoj veten. Po mendoj të iki nga Shqipëria, duke kërkuar alternativa. Thjeshtë mos flasim më për mbështetje, për polici, për politika sociale.

Nuk ekzistojnë, janë selektive “!

AlbaniaWeb.net