“Duhet rinovim i thellë, nuk bëhet fjalë për një a dy emra”, Gert Bogdani: Ringritje përmes hapjes së partisë dhe garës reale

Ish deputeti demokrat, Gert Bogdani shprehet se pas humbjes në 14 maj, Partia Demokratike duhet të përfshihet në një proces të thellë rinovimi dhe këtu nuk bëhet fjalë, sipas tij, për largimin e një apo dy emrave.

Në një status në faqen e tij në Facebook, ai shprehet se ringritja e demokratëve, duhet të vijë përmes hapjes së partisë dhe garës reale brenda saj.

Statusi i Bogdanit

14 Maji shënon një ditë që kërkon reflektim të thellë dhe reagim të shpejtë për rimëkëmbjen jo thjeshtë për të shpëtuar të djathtën dhe për të mirën e demokratëve – por për të rikthyer shpresën në këtë vend dhe për të mirën e të gjithë shqiptarëve!

Përtej deformimit të vullnetit të zgjedhësve me blerje votash me eurot e korrupsionit dhe trafikut, po edhe paratë e investimeve elektorale të partisë-shtet, si edhe përmes shantazhit dhe presionit të bandave, të administratës dhe ndaj administratës, patronazhistëve e aktivistëve, rezultati i 14 Majit është shumë dimensional.

Ndaj duhet të lexohet me kujdes edhe si një mesazh i qartë refuzues i qytetarëve ndaj ofertës aspak frymëzuese të ndasive, mllefeve, fjalëve të thëna ndaj njëri tjetrit, nihilizmit kolektiv dhe “luftës së klasave” brenda llojit.

Duhet të lexohet dhe të kuptohet edhe si një refuzim i modeleve arriviste që për hir të karrierës mashtrojnë, bëjnë hile e kompromise, tregtojnë, shesin e blejnë vota, që kompromentohen, servilosen, e katapultohen gjithëkund.

Duhet të lexohet si mungesë e votës së demokratëve dhe shqiptarëve në kutitë e votimit – të atyre që janë larguar nga Shqipëria dhe të atyre që u detyruan të qëndrojnë në shtëpi! Të atyre që janë larguar sepse qeveria ia ka nxirë jetën, por opozita nuk i ndez shpresë për të qëndruar dhe luftuar në këtë vend. Të atyre që janë ende këtu, por nuk dalin të votojnë sepse nuk u ofrohet alternativë e qartë e reale!

Sepse në fund të ditës, përçarja, mllefet mes njëri tjetrit, mungesa e meritokracisë, e së drejtës e garës, nuk kanë se si të prodhojnë alternativë dhe të frymëzojnë shpresë e të ngrejnë peshë votuesit!  Pasi humbja e paprecedentë e 14 majit ishte edhe rezultat i reagimit qytetar ndaj alternativës së dobët, shpesh pa vizion të qartë dhe në zgrip të populizmit dhe diletantizmit.

*

Nëse opozita dhe e djathta shqiptare në tërësi vendos interesin e vendit dhe të shqiptarëve mbi interesin e vet dhe të përfituesve të pushtetit, duhet të hapë sytë e mendjes dhe të zemrës – dhe të shohë, kuptojë e pranojë gabimet brenda vetes. Njohja e problemit është gjithmonë hapi i parë i zgjidhjes së tij!

Opozita dhe e djathta shqiptare në tërësi ka sot më shumë se kurrë nevojë për bashkim! E kam thënë, e them, e do vazhdoj ta them se ky është hapi më i rëndësishëm. Sepse zgjedhjet janë arithmetikë dhe frymë bashkë! Të ndarë jemi më pak, të ndarë nuk frymëzojmë!

Së dyti, duhet një reformim i thellë i mënyrës së punës dhe organizimit. Duhet lënë pas koha kur fushata fillon vetëm dy muaj para zgjedhjeve e kur programet i shpalosen elektoratit dy javë para ditës së votimit! Zgjedhësit janë aty çdo ditë dhe për një partneritet real me ta nuk vlen të kujtuarit vetëm në fushatë a periudhë zgjedhore!

Së treti, duhet një rinovim i thellë. Këtu nuk bëhet fjalë veç për një a dy emra, por për një kastë të tërë njerëzish, që kanë tashmë kanë vite që vazhdojnë me të njejtat gabime që sjellin të njejtat dështime dhe që realisht nuk kanë çfarë t’u ofrojnë më bazës që meriton lidership fitues dhe qytetarëve të ndershëm e plot halle që presin një alternativë bindëse!

Shqipëria jonë ka plot djem e vajza të reja profesionistë e intelektualë, plot potencial, energji dhe dëshirën për të punuar për këtë vend e për të ndryshuar të ardhmen e këtij vendi. Ka ardhur koha që atyre t’u krijohet hapësira dhe t’u jepet shansi për ta treguar veten e për të rindezur shpresën në këtë vend! Që të rinjtë shqiptarë mos ta braktisin vendin e tyre, por ta shohin si vendin ku mund të ndërtojnë të ardhmen e tyre dhe familjeve të tyre!

Këtë opozita dhe e djathta shqiptare e ka detyrim kundrejt çdo shqiptari të ndershëm, e ka detyrim ndaj Shqipërisë! Marrja e përgjegjësive dhe ringritja përmes hapjes perbashkuese, rinovomit, garës reale dhe demokracisë së brendshme do të jenë vendimtare për ofertën që opozita dhe e djathta shqiptare do sjellin në garën e ardhshme jo të largët të zgjedhjeve 2025. Sepse Shqipëria dhe shqiptarët meritojnë më shumë!