VIDEO/ Spanja në majën e Europës, iberikët shpallen kampionë, Anglia duhet të presë përsëri

“Mbret” të Evropës, kampion në Berlin, me Spanjën që triumfon në finalen e madhe duke thyer Anglinë me rezultatin 2-1. Gola, spektakël, me Furinë e Kuqe që i bën një mbyllje perfekte këtij Evropiani, ndërsa kupa mbetet makth për Anglinë, me ishullorët që dalin sërish duar bosh.

Një finale nuk luhet, por fitohet, të vetëdijshëm për këtë, dy ekipet zbriten me respekt dhe frikë në fushë, mbi të gjitha Anglia, me “Tre Luanët” që e kishin të vështirë të ishin efikas. Nuk bëri më mirë as Spanja, sigurisht kishin kontrollin e topit, por Yamal e Nico Willimas u bllokuan në krahë duke mos arritur dot as të depërtonin e as të shërbenin në zonë. Dy ekipet zhvilluan një pjesë të parë të luftuar për çdo top, në çdo cep të fushës, duke bërë që goditja e parë në kuadrat të vinte vetëm në minutën e 47-të me Phil Foden. Fraksioni i dytë krijoi iluzionin se gjërat do të shkonin në “malore” për De la Fuenten, me teknikun spanjoll që u detyrua të bënte pa Rodrin, me mesfushorin që qëndroi në dhomat e zhveshjes si pasojë e një dëmtimi, por “furia e kuqe” e nisi “zjarr”, ku në aksionin e parë, në topin e parë, Lamine Yamal dhuroi një super assist për Nico Willimas që nuk fali brenda në zonë duke dërguar topin në rrjetë. Goli trullosi Anglinë, ndërsa Southgate ndërhyri në formacion duke ulur në stol kapitenin Harry Kane për Watkins.

Për t’i dhënë zemër “Tre Luanëve” mendoi Jude Bellingham, por goditja e yllit anglez përfundoi ngjitur me shtyllën pingule. Më Anglinë përpara, Yamal për pak i kapi “mat” në minutën e 67-të, por goditja e tij u devijua në këndore nga portieri Pickford. Me lëvizjen e dytë, Southgate bëri “bingo”, teksa Palmer, i sapo hedhur në fushë, në minutën e 73-të, me një super goditje nga distanca barazoi shifrat në 1-1, duke rikthyer ishullorët në lojë. Atëherë kur gjithçka po shkonte drejt fundit, në minutën e 87-të, Cucurella futi një top perfekt në zonë, aty ku Oyarzabal gjeti prekjen fituese duke mposhtur Pickford për herë të dytë, një gol me shije trofeu, pasi rezultati mbeti i pandryshuar deri në fund, me Spanjën që bën poker trofesh duke u shpallur kampione Evropë për herë të katërt në histori.

(J.S/)