Ç’po kërkojnë? Policia mësyn në 4 banesat e Andrew Tate në Rumani

Policia rumune ka kryer kontrolle në shtëpitë e influencuesit Andrew Tate si pjesë e një hetimi mbi akuzat e reja që janë shtuar kundër tij.

Autoritetet rumune raportuan se katër banesa u kontrolluan në Bukuresht dhe provincën Ilfov, sipas mediave të huaja.

Tate është në pritje të gjykimit për akuzat e përdhunimit dhe trafikimit të qenieve njerëzore, por akuzat potencialisht mund të zgjerohen për të përfshirë akuza shtesë për marrëdhënie seksuale me të mitur, trafikim të të miturve, pastrim parash dhe tentativë për manipulim të dëshmitarëve.

Vëllai i Tate, Tristan, dhe dy gra rumune janë gjithashtu të akuzuar në të njëjtën çështje. Të dy vëllezërit i kanë mohuar të gjitha akuzat ndaj tyre. Ata u arrestuan në Rumani në dhjetor 2022 dhe u liruan nga arresti shtëpiak në gusht 2023.

Në një postim në X (ish-Twitter), Tate ka shkruar ndër të tjera se “shpifja është mjeti i tyre numër një dhe procesi është ndëshkimi. Por për fat të keq për ta, e mira fiton gjithmonë në fund.”