Ish-burri leu dhe dogji me benzinë 31-vjeçaren, reagon ministrja e Shëndetësisë: Mjekët e Djegie-Plastikës po bëjnë të pamundurën për Melisën
Ministrja e Shëndetësisë Albana Koçiu ka reaguar në lidhje me ngjarjen e rëndë të shënuar pasditen e së shtunës në Korçë, ku një 45-vjeçar leu me benzinë dhe i vuri flakën ish-gruas së tij.
Ministrja shprehet se mjekët e shërbimit të Djegie-Plastikës në QSUNT po bëjnë më të mirën e mundur për Melisën, “vajzën, nënën e dy fëmijëve të vegjël nga Korça, e cila u sulmua sot në mënyrë brutale nga një “burrë” frikacak, që duhet të ishte krahë saj për ta mbështetur në rritjen e edukimin e fëmijëve, por që sot në mënyrë tinzare vendosi të kthehet në agresorin e saj, nënës së fëmijëve të tij”.
“E teksa inkurajoj institucionet përgjegjëse për ndalimin dhe dënimin maksimal të tij, i jam pranë me zemër familjes së Melisës. Askush nuk duhet të përjetojë një dhimbje të tillë.
Do të qëndrojmë kundër dhunës dhe mbështesim të gjithë ato gra që bëhen viktima të këtyre “burrave” që meritojnë ndëshkim maksimal. Kjo është një betejë që askush nuk e fiton dot vetëm, ndaj bashkë duhet të punojmë shumë e të bëjmë të pamundurën, të parandalojmë ngjarje si kjo e sotmja”, shprehet ajo.
AlbaniaWeb.net
